Një pjesë e serbëve kundërshtojnë zgjedhjet lokale

Nënkryetari i Kuvendit të Bashkësisë Serbe të Komunave tha për BBC-në se serbët kanë përfaqësuesit e tyre legjitimë të zgjedhur në zgjedhjet serbe të vitit të kaluar dhe duhet t’i binden këshillave të qeverisë dhe kishës serbe për bojkot të zgjedhjeve të Kosovës.

Autoritetet kosovare dhe ato ndërkombëtare u kanë bërë thirrje serbëve që të dalin në zgjedhje dhe të vetqeverisin në disa komuna.

Një grup intelektualësh të Serbisë po qëndrojnë në Kosovë për t’i nxitur serbët që të marrin pjesë në zgjedhjet lokale të së dielës dhe të vendosin vet për të ardhmën e tyre.

22 subjekte politike serbe do të marrin pjesë në zgjedhjet e së dielës.

Përkrahësit serbë të këtyre zgjedhjeve thonë se ato paraqesin një rast për mbijetesën e serbëve në hapësirat e Kosovës.

Por për zotin Jakshiq, pjesëmarrja në zgjedhje është në dëm të të ardhmës së serbëve në Kosovë.

Korrespondentja e BBC-së në Prishtinë, Violeta Hyseni bisedoi me politikanin serb, Marko Jakshiq.

Çdo dalje e serbëve në zgjedhje do të thotë njohje e pavarësisë së Kosovës.   Marko Jakshiq, politikan serb në Kosovë

BBC: Zoti Jakshiq, ju këto ditë keni përsëritur se serbët e Kosovës nuk duhet të dalin në zgjedhje, por ka serbë të Kosovës që do të votojnë të dielën. Pse ju mendoni se serbët nuk duhet të votojnë?

Marko Jakshiq: Çdo dalje e serbëve në zgjedhje do të thotë njohje e pavarësisë së Kosovës. Ne kemi pasur rastin kur shqiptarët në vitet 90-të nuk i janë përgjigjur thirrjeve të Millosheviqit që të marrin pjesë në jetën politike të Serbisë dhe personalisht mendoj se as serbët sot nuk duhet, nga pozicioni i tanishëm, të marrin pjesë në formimin edhe të një shteti shqiptar në Ballkan, sepse çdo dalje e serbëve në këto zgjedhje do të thotë njohje e Kosovës si shtet i pavarur.

Mendoj se bashkësia serbe do ta dëgjojë para se gjithash jo zërin e shtetit serb, por atë të Kishës Serbe dhe se serbët nuk do të dalin në këto zgjedhje. Ne e dimë se disa serbë do të dalin të votojmë, por e dimë poashtu që edhe Millosheviqi i kishte më herët disa shqiptarë 'të ndershëm' politikisht, kështu që edhe shqiptarët tani kanë disa serbë 'të ndershëm', të cilët për interesa të ndryshme marrin pjesë në jetën politike të krahinës dhe në këtë mënyrë e njohin pavarësinë e Kosovës.

BBC: Zoti Jakshiq, është thënë se këto zgjedhje janë një mundësi e mirë për serbët që të zgjedhin përfaqësuesit e tyre legjitimë?

Këta nuk do të ishin përfaqësuesit legjitimë të serbëve, por do të ishin përfaqësues të shqiptarëve.   Marko Jakshiq, politikan serb në Kosovë

Marko Jakshiq: Serbët kanë zgjedhur përfaqësuesit e tyre legjitimë me 11 maj të vitit të kaluar. Këta, domethënë, nuk do të ishin përfaqësuesit legjitimë të serbëve, por do të ishin përfaqësues të shqiptarëve, sepse e përsëris, ata do të ishin serbë 'të ndershëm' politikisht për shqiptarët e qeverisë së Hashim Thaçit.

Kështu që serbët i kanë përfaqësuesit e tyre legjitimë, i kanë delegatët e tyre në Kuvendin e Serbisë dhe ata duhet t’i përmbahen kësaj, ndërsa zgjedhja e përfaqësuesve tjerë sipas dëshirës së qeverisë së Prishtinës, nuk do të ishte me perspektivë për qëndrimin e serbëve këtu. Mendoj se në kuadër të një qeverisje të tillë nuk do të kenë të ardhme në Kosovë.

BBC: A do të sanksiononi çfarëdo votuesi potencial serb të dielën?

Marko Jakshiq: Unë nuk jam në pozitë të tillë që të mund të sanksionoj këdo qoftë, duke pasur parasysh se partia politike të cilës i përkas, nuk është në pushtet. Në pushtet në Beograd kanë ardhur disa njerëz të rij, nuk e di a do ta bëjnë ata këtë, por pozita ime sot nuk mundëson saksionimin e askujt sepse nuk jam në pushtet.

BBC: Por a mendoni ju se votuesit eventualë serbë duhet të saksionohen po të ishit ju në pushtet?

Marko Jakshiq: Sikur ne të ishim në pushtet, të gjithë ata që janë të përfshirë në një mënyrë në process zgjedhor, ne do t’ua kufizonim ndihmën materiale, donacionet e pagat që i marrin nga Serbia, sepse thjesht nuk mundeni të merrni dy paga nga dy punëdhënës të ndryshëm, duhet të përcaktoheni për njërin.

Një vend nuk mund t’i ketë dy zot shtëpie, ose do të zgjidhni shtetin e Serbisë ose atë të Kosovës. Nëse e doni shtetin e Serbisë, atëherë nuk mund të merrni pjesë në procesin zgjedhor për shtetin e pavarur të Kosovës, e nëse e bëni këtë atëherë nuk mund të merrni mbështetjen financiare që e jep Beogradi.

BBC: Zoti Jakshiq, Komisioni Qëndror i Zgjedhjeve ka paralajmëruar hapjen e vendvotimeve alternative. A do të thotë kjo se në mjediset serbe nuk do të lejohet hapja e vendvotimeve në shkolla apo në institucione të tjera, sidomos në veri të Kosovës?

Marko Jakshiq: Gjithkund në botë duhet të respektohet vullneti zgjedhor i shumicës së qytetarëve. 99 përqind e serbëve në këto hapësira është kundër zgjedhjeve lokale të organizuara nga qeveria e Kosovës. Të gjitha shkollat dhe ndërtesat e tjera këtu i ka ndërtuar Serbia, nxënësit dhe prindërit e tyre janë serbë dhe ata sigurisht që duhet të pyeten a e dëshirojnë Kosovën e pavarur apo jo.

Hapja me dhunë e vendvotime dhe provokimi i konflikteve mendoj se nuk i sjell asgjë të mirë askujt, sepse nuk mundeni me dhunë që të konstituoni apo të impononi çfarëdo pushteti. Duhet të respektohet edhe bindja politike e serbëve. Bindja e tyre është se nuk janë për një shtet të pavarur shqiptar, serbët e kanë shtetin e tyre, Serbinë dhe për këtë arsye nuk shoh asnjë shkak dhe asnjë nevojë që në mënyrë të njëanshme të provokohen konflikte te bashkësia serbe në veri të Kosovës dhe Metohisë.