'Gëzimi i lumturisë' është titulli në faqe të parë të The Independent nën një fotografi të madhe të kancelares gjermane Angela Merkel mes ish udhëheqësit të Bashkimit Sovjetik, Mikhail Gorbachov dhe ish presidentit polak dhe udhëheqësit të Solidaritetit, Leh Valesa.

Po kjo gazetë shkruan për pezullimin e planeve të qeverisë britanike për një bankë të dhënash të të gjitha telefonatave, email-eve dhe vizitave në internet të çdo britaniku.

Sipas The Independent ministria e brendshme britanike ka konfirmuar se plani për skemën e ashtuquajtur 'Big Brother' është shtyer deri pas zgjedhjeve të përgjithshme të vitit të ardhshëm për shkak të protestave të shumta se mund të abuzohet me këtë skemë gjatë fushatës për këto zgedhje.

E përditshmja The Times në faqe të parë sjell një titull optimist për ekonominë e vendit.

Nën titullin 'Britanikët presin së shpejti ditë më të mira' sugjerohet se ekonomia e Britanisë së madhe ka filluar të ringjallet pas një periudhe të zbehtë si rezultat i recesionit global.

Sipas një sondazhi të agjensisë Populus blerjet dhe shpenzimet që pritet t'i bëjnë britaniket në prak të festave të vitit të ri do të ndihmojnë ringjalljen ekonomike të vendit.

Në mes të shenjave të tjera optimiste edhe monedha britanike sterlina ka shënuar rritjen më të madhe gjatë tre muajve të fundit ndaj dollarit amerikan.

E përditshmja Daily Telegraph në faqe të parë sjell një artikull ku thuhet se 8 nga 10 infeksionet që merren në spital nuk raportohen dhe se pacientët vdesin pa nevojë për shkak se Autoriteti publik i shëndetësisë është duke u përqëndruar vetëm në luftimin e dy super viruseve kryesore.