John Sudworth BBC, Seul

	Incidenti mes Koreve vjen përpara vizitës në Seul të presidentit Obama

Një barkë koreanoveriore patrullimi njoftohet të ketë pësuar dëme, megjithatë nuk është e qartë nëse ka viktima.

Koreja e Jugut thotë se asnjë prej marinarëve nuk ishte plagosur.

Të dyja palët fajësojnë njëra-tjetrën për incidentin.

Sipas forcës detare koreanojugore një barkë koreanoveriore patrullimi kaloi kufirin e kontestuar detar mes të dyja vendeve dhe nuk ndaloi pas të shtënave paralajmëruese.

Ushtria koreanoveriore thotë se barka e patrullimit ishte në pjesën veriore të linjës ndarëse kur u qëllua dhe kërkon që Jugu të kërkojë falje.

Kufiri detar që kalon në pjesën perëndimore të gadishullit korean, është caktuar nga komandantë të forcave të SHBA-së në fund të luftës koreane dhe është disktuar vazhdimisht nga Veriu.

Ky incident nuk është pa precedent.

Një përplasje e ngjashme në të njëjtën zonë la gjashtë koreanojugorë të vdekur në 2002 dhe të paktën 17 detarë koreanoveriorë njoftohet të jenë vrarë gjatë një shkëmbimi zjarri mes anijesh në vitin 1999.

Jugu e ka akuzuar Veriun se është përpjekur të provokojë incidente të tilla me qëllim që të rrisë tensionet.

Javët e fundit, Pheniani po përpiqet me forcë për bisedime direkte me SHBA-në, diçka për të cilën beson se do të ndihmojë për të sjellë lëshime më tepër se bisedimet gjashtëpalëshe.

Incidenti i fundit vjen vetëm disa ditë përpara se presidenti Barack Obama pritet të vizitojë kryeqytetin koreanojugor.