Nazim Rashidi BBC Shkup

	Autoritetet thonë se nuk duhet të ketë panik

Me uljen e temperaturave është rritur dhe rreziku për përhapjen e virusit të gripit të ri, të njohur si gripi i derrit.

Autoritetet në Maqedoni kanë bërë të ditur se në ditët e fundit është rritur numri i atyre që janë konfirmuar se janë prekur nga virusi.

Megjithatë, ata thonë se numrat e personave të prekur që janë rreth 100, janë të ulët në krahasim me vendet e tjera.

Por njoftimet për shtimin e të prekurve nga virusi H1N1, ka rritur edhe shqetësimet tek qytetarët.

Në një shkollë në Shkup, prindërit nuk kishin dërguar fëmijët në një numër tejet të madh.

Nga Ministria e Shëndetësisë thonë se ende nuk parashikohen masa drastike që do të sugjeronin mbylljen e shkollave.

Nga atje bëjnë thirje për të ndërmarrë masat të cilat rekomandohen vazhdimisht dhe që kanë të bëjnë me mirëmbajtje të higjienës personale.

Në Maqedoni ende nuk ka mbërritur vaksina kundër gripit të derrave, ndërkohë që farmacitë bëjnë të ditur se përdorin shumë vaksinat kundër gripit të zakonshëm.

Ajo që insitojnë autoritetet është qetësia. Njoftimet për përhapje massive të virusit H1N1 në Serbi kanë bërë që njerëzxit të tregojnë nivele të larta shqetësimi.

Autoritetet thonë se shifrat në Maqedoni janë ende të ulta dhe bëjnë thirje që të gjithë të dyshuarit të bëjnë kontrolle mjekësore.