Deklarata vjen pas një jave polemikash që kanë mbërthyer opinionin publik pas sulmit fizik kundër gazetarit Mero Baze për të cilin akuzohet Rezart Taçi, pronari i kompanisë, Taçi Oil.

Në deklaratë thuhet se “nëpërmjet kësaj thirrje synohet nisja e një aksioni të përbashkët për të vendosur standarte të reja për lirinë e shtypit në Shqipëri”.

Firmëtarët e deklaratës angazhohen se do të rrisin presionin mbi qeverinë, parlamentin dhe opinionin publik, lidhur me standartet e ulta të lirisë së shtypit.

Gazetarët shqiptarë, nënvizohet në dokument, po ndeshen përditë me një regjim politiko-mediatik, ku mbizotëron përpjekja për të mbajtur nën kontroll me të gjitha mjetet fjalën e lirë dhe gazetarinë investigative.

Në fund të deklaratës, firmëtarët i kërkojnë ndihmë organizmave ndërkombëtare dhe institucioneve prestigjoze ndërkombëtare për lirinë e medias që t’i mbështesin në këtë përpjekje “për mbrojtjen e lirisë së shtypit në Shqipëri dhe arritjen e standarteve perëndimore”, siç cilësohet në thirrje.

Vendim për mbajte në burg të Rezar Taçit

Gjykata e Shkallës së Parë e Tiranës i ka komunikuar presidentit të Kompanis Taçi Oil, Rezart Taci, masën e sigurisë, “burg pa afat”, pas denoncimit “për ushtrim dhune” që i bëri biznesmenit, gazetari Mero Baze.

Sulmin ndaj gazetarit Mero Baze e kanë dënuar kryeministri Sali Berisha, kryetari i opozitës Edi Rama, një numër përfaqësuesish diplomatikë në Tiranë, shoqata dhe komuniteti i gazetarëve.