Fatos Ahmati BBC, Tiranë

	Maxhoranca dhe opozita janë ende larg arritjes së kompromisit

Kreu i PBDNJ-së, Vangjel Dule ka ftuar maxhorancën të hedhë hapin e parë duke thënë se duhen vendosur interesat e vendit mbi ato partiake.

Por kryetarja e parlamentit Jozefina Topalli tha se asnjë interes partiak nuk mund të kundërshtojë vendimin e gjykatave.

Ndonëse pa praninë e opozitës socialiste parlamenti shqiptar është përfshirë në debat rreth nevojës së një kompromisi midis maxhorancës dhe opozitës për të mundësuar hyrjen e kësaj të fundit në kuvend.

"Edhe pse qeveria mund të hezitoje, ngrihuni në nivelin e kërkesave të kohës, ofroni ju kompromisin historik Ndoshta nuk do të jetë në favor të Partisë Demokratike në tërësinë e pretendimeve të saj, por me siguri do të jetë në favor të Shqipërisë",tha kryetari I Partisë për të Drejtat e Njeriut.

"Është momenti, çdo ditë që kalon është me kosto të lartë", tha zoti Dule.

Por në një përgjigje të menjëhershme kryetarja e parlamentit, Jozefina Topalli tha se asnjë interes partiak nuk mund të kundërshtojë vendimin e gjykatave.

"Nuk ka vendim politik mbi vendimet gjyqësore. Çdo kompromis tjetër, çdo mundësi tjetër që jep Kushtetuta e kanë me të gjithë fleksibilitetin e maxhorancës dhe të kryetares së Kuvendit" tha zonja Topalli.

Opozita socialiste këmbëngul ne hapjen e disa kutive të votimit të zgjedhjeve të 28 qershorit ku ajo dyshon se janë manipuluar rezultatet, si një kusht për hyrjen në parlament.

Sipas kryetares së parlamentit javën e ardhshme pritet miratimi i disa ligjeve të rëndësishme, lidhur me përshpejtimin e proceseve integruese të vendit.

Disa deputetë socialistë kanë deklaruar se do të jenë prezentë në momente të tilla, çka mund të shënojë dhe hyrjen e parë të një grupi deputetësh në parlamet duke i dhënë fund bojkotit.

Ndëkaq nga pëfaqësues të rëndësishëm të komunitetit ndërkombëtar vazhdojnë të vijnë e mesazhe për nevojën e dhënies fund të bojkotit parlamentar, por opozita socialiste ka lajmëruar protestën e radhës.