Ministria e Shëndetësisë në Kosovë ka dërguar Tamiflu në Graçanicë

Konfirmimi për infektimin e tre personave me virusin AH1N1 ka ardhur pas analizave të bëra në një institut në Serbi.

Bilanci i rasteve të konfirmuara me gripin e derrit në Kosovë që nga paraqitja e kësaj sëmundje është ngritur në nëntë, kanë bërë të ditur autoritetet shëndetësore.

Mjekët kanë thënë se gjendja e pacientëve është nën kontroll dhe kanë bërë thirrje tek qytetarët që të mos krijojnë panik.

Ministria kosovare e Shëndetësisë i ka dërguar qendrës shëndetësore në Graçanicë një mijë tableta Tamiflu, ndërkohë që një porosi tjetër me medikamente dhe material shpenzues mbrojtës do të dërgohet të premten.

Zyrtarë të ministrisë thonë se edhe qendrave tjera shëndetësore që menaxhohen nga serbët në pjesë të ndryshme të Kosovës u është ofruar ndihmë si në medikamente ashtu edhe në parandalimin e përhapjes së virusit.

Drejtoresha e Shtëpisë së Shëndetit në Graçanicë, Rada Trajkoviq ka kërkuar që çështja e furnizimit me medikamente kundër gripit të derrave në qendrat shëndetësore serbe nga ana e Ministrisë së Shëndetësisë të mos politizohet.

Ajo tha se në raste të tilla, ndihmat janë të mirëseardhura si nga Beogradi, ashtu edhe nga Prishtina.

Violeta Hyseni bisedoi me zonjën Trajkoviq dhe fillimisht e pyeti për rastet e fundit të të infektuarve me virusin AH1N1.

Trajkoviq: Po, pikërisht Instituti Torllak ka konfirmuar sëmundjen te tre pacientë, një rast është në Graçanicë, mjekët tanë të Shtëpisë së Shëndetit e kanë njoftuar Shërbimin Epidemilogjik në Mitrovicë, janë marrë analizat dhe Instituti e ka konfirmuar rastin.

Fatkeqësisht e kemi një të sëmurë, ajo është një vajzë 13 vjecare. Në familje ka edhe tre fëmijë dhe ajo që është brengosëse është se nxënësit e klasës së tetë kanë qenë në ekskursion në Llepenski Vir në Serbi dhe druajmë se do të ketë edhe raste tjera.

Ne kemi identifikuar edhe tre fëmijë që kanë simptoma të gripit dhe do t’I përcjellim e do të shohim a do të përhapet kjo.

BBC: Sipas vlerësimeve tuaja, si është gjendja e pacientëve?

Trajkoviq: Konkretisht në këtë rast ne e kemi vizituar dje një vajzë, gjendja e saj është më e mirë, më e qëndrueshme, ndërsa pacientët tjerë po I përcjellim dhe tani për tani nuk ka vend për panik.

BBC: A po ndërmerren masa për parandalimin e përhapjes së virusit?

Trajkoviq: Po, të gjitha ato që kanë qenë udhëzime të Ministrisë së Shëndetësisë së Serbisë, ne i kemi bërë. Nuk kemi pasur medikament Tamiflu, por Ministria e Shëndetësisë na ka porositur tani një mijë tableta dhe unë I falënderohem për këtë. Dua të them se shëndetësia bashkëpunon në një mënyrë të përgjegjshme dhe të gjithëve u them se shëndeti i njerëzve nuk është cështje që ka të bëjë me statusin e Kosovës, por është cështje njerëzore, etike dhe morale.

BBC: Domethënë ju furnizoheni me barëra nga Beogradi dhe nga Prishtina apo jo?

Trajkoviq: Natyrisht gjithnjë kur është dicka urgjente, ne nuk zgjedhim adresë sepse u ndihmojmë njerëzve.

BBC: Zonja Trajkoviq, a ekziston rreziku që epidemia të përhapet në mjediset serbe në Kosovë, posaçërisht kur kemi parasysh se gjendja epidemiologjike në Serbi është jo shumë e mirë?

Trajkoviq: T’ua them sinqerisht, duke pasur parasysh se mjediset serbe në Kosovë janë të vogla, nëse nuk ka preventivë të mirë mjekësore dhe kontrollë, mundësia e përhapjes është reale.

Por do ta përcjellim gjendjen dhe do të bëjmë krejt cka është e mundur që ta parandalojmë.

Natyrisht në këtë aspect do të mirëpresin ndihmën e të gjitha institucioneve qëllimmira, edhe vendore, edhe ndërkombëtare.
Presim që ndoshta së shpejti do të marrim edhe vaksinën kundër gripit të derrave.

Ne tani kemi një sasi të madhe të vaksinave për gripin sezonal, thonë se ajo ndihmon diku 50 përqind.

Tani për tani vëtem këtë mënyrë të parandalimit mund t’ua ofrojmë pacientëve tanë, por vaksinën e vërtetë që është kundër këtij lloji të gripit për fat të keq nuk e kemi ende, përvec këtyre tabletave që kanë një rëndësi të madhe për ne.