Abu Omar u rrëmbye në rrugët e Milanos në vitin 2003

Të gjithë të dënuarit, me përjashtim të njërit prej tyre, kanë qënë oficerë të CIA-s që kryenin operacionet e njohuara të marrjes në pyetje jashtë SHBA-së.

Amerikanët u dënuan nga 5 deri në 8 vjet burg. Në mesin e operatorëve të CIA-s janë edhe shefat e Shërbimit Serkret Amerikan në Romë dhe Milano.

Amerikanët janë gjykuar në mungesë, sepse SHBA-ja ka refuzuar t'i ekstradojë ata.

Shtetet e Bashkuara shprehën zhgënjimin lidhur me vendimin e gjykatës italiane.

Zëdhënësi i Departamentit amerikan të Shtetit Ian Kelly tha se ka mundësi që të apelohet ndaj vendimit.

"Ne jemi të zhgënjyer nga vendimet e marra ndaj amerikanëve dhe italianëve të akuzuar në Milano për një përfshirje të pretenduar në rastin e klerikut egjiptian Abu Omar."

"Gjykatësi nuk e ka dhënë ende opinionin e tij me shkrim, ndaj edhe nuk mund të komentojmë më tej për vendimin dhe për arsye se ky proces po vazhdon."

"Ndoshta do të apelojmë ndaj edhe nuk mund të komentojë për specifikat e këtij rasti", tha zoti Kelly.

Dy agjentë italianë u gjetën gjithashtu fajtorë për rrëmbimin e klerikut, Abu Omar dhe dërgimin e tij në Egjipt ku ai pretendon se është torturuar.

Ky ishte i pari gjyq i këtij lloji në botë thotë një korrespondent i BBC-së në Romë.