Merkel ende nuk është shprehur nëse është në favor të Blair-it

The Guardian shkruan se " Kandidatura e Blair-it për postin kryesor të BE-së mbytet."

Shanset e ish kryeministrit veniten, ndërsa Sarkozy dhe Merkel dështojnë ta përkrahin atë.

Disa orë pasi Gordon Brown, shkruan gazeta, bëri një nga deklaratat më të forta në përkrahje të zotit Blair, burimet britanike bënë me dije se ish kryeministri nuk dukej se do të merrte postin e profilit të lartë.

The Times shkruan " Shanset e Blerit për presidencën e BE-së veniten në mes thirrjes për një drejtues, jo udhëheqës të plotfuqishëm."

Gazeta thotë se ka lëvizje klandestine që e Djathta e qendrës të marrë postin kryesor.

Kandidatura për ish kryeministrin britanik u sulmua nga udhëheqës evropianë të së djathtës dhe të majtës në një samit në Bruksel, megjithë apelin e Gordon Brown-it drejtuar partive motra laburiste në Evropë që të merrnin parasysh meritat e Zotit Blair.

Zoti Brown, shkruan gazeta, e gjeti veten të izoluar në mes shtatë qeverive të tjera të së majtës së qendrës.

Megjithëse nuk pati asnjë fjalë të drejtpërdrejtë nga zonja Merkel që shihet si mbreterësha e Evropës, diplomatët britanikë duket se pranuan se zoti Blair nuk po dukej se po merrte përkrahjen e saj dhe pranuan se shpresat po veniteshin.

The Daily Telegraph shkruan "Sulmi i xhuxhëve për të bllokuar përrallën e Blair-it."

Megjithë përpjekjet e bëra nga zoti Brown, udhëheqësit socialistë evropianë bënë të ditur se donin një kandidat të qendrës së djathtë që të zgjidhej president dhe një të krahut të majtë si përfaqësues të lartë të BE-së për çështje të jashtme.

Socialistët, midis të cilëve Jose Zapatero, kryeministër i Spanjës, vendosën emrin e zotit Miliband në një listë për atë post. Zoti Miliband, ministër i jashtëm britanik tha se nuk ishte i interesuar.

The Financial Times shkruan " Vala kthehet kundër Blair-it për postin e BE-së. "

Tony Blair nuk e ka shpallur veten ende si kandidat që të jetë president i BE-së, por megjithatë pati shenja mbrëmë se përkrahja po largohej.

Zoti Blair, shkruan artikulli, asnjëherë nuk u pa në Evropë si shumë socialist, kështu që nuk pati habi që disa nga udhëheqësit e të majtës së qendrës dhe deputetët u kthyen kundër tij në një takim në Bruksel, duke shtuar se lufta në Irak provoi se ai është një figurë ndarëse.

Por megjithatë, shkruan gazeta, fati i zoti Blair nuk do të vendoset kryesisht nga udhëheqësit socialistë, por nga udhëheqës të partive dominuese të së djathtës së qendrës.

Gazeta përmend disa emra që po shfaqen si kandidatë si Jean Claude Juncker, kryeministër i Lukemburgut, Jan Peter Balkenende, kryeministër hollandez, Paavo Lippoenne, kryeministër i Finlandës dhe John Bruton, ish kryeministër irlandez.

The Indipendent shkruan "Përkrahja për Blair bie, megjithë misionin shpëtues të kryeministrit (Brown)"

Gazeta shkruan se Gordon Brown është përfshirë në një debat të nxehhtë me politikanin gjerman, Martin Shultz, drejtuesin e grupit socialist në Parlamentin Evropian. Shultz ka disa javë që bën fushatë kundër zotit Blair.

Ai kundërshton caktimin e tij si rezultat i përkrahjes që Blair i bëri luftës në Irak si dhe vendimit të Blair-it për ta mbajtur Britaninë jashtë Euros dhe Shengenit.