http://www.bbcalbanian.com

Botuar: E mërkurë, 09 shtator 2009 - 13:40 CET

Korrespondenti i BBC-së Jonuz Hallaçi

Kriza ekonomike ndikon në prurjet e emigranteve

Statistikat zyrtare flasin se këtë vit ka patur më shumë emigrantë të rikthyer në Shqipëri, por praktikisht ata dhe familjarët e tyre thonë se kanë sjellë më pak para, që në gjuhën e financave njihen si remitancat, ose të ardhurat që vijnë në Shqipëri nga puna e emigrantëve.

Emigracioni shqiptar që llogaritet afro një million veta, kryesisht në vendet e perëndimit, vende tashmë të prekura nga kriza, kanë qenë burimi kryesor për jetesën e mijëra familjeve, madje në vitet e fundit dhe me një tendencë për t'u rikthyer si investitorë në vendin e tyre.

Mungesën e dërgimit të parave e ndiejnë më shumë familjet në Shqipëri, të cilat vite më parë kanë marrë më shumë para nga familjarët e tyre të punësuar në emigracion.

"Kam vëllain në Itali prej gjashtë vitesh. Në vitet e para ka sjellë para për familjen por në dy vitet e fundit, thuajse asgjë. Kriza që ka përfshirë dhe Italinë ka ndikuar në rënien e të ardhurave të tij saqë pret të marrë dokumentat e qëndrimit dhe do të rikthehet në Shqipëri", thotë Vullneti, vëllai i madh i një emigranti në Itali.

Vetë emigrantët që janë këtë verë për pushime në Shqipëri, thonë se në vendet ku punojnë po vuajnë pasojat e krizës ekonomiko-finaciare që ka përfshirë ekonominë botërore.

Luli është një emigrant i ligjshëm në Britaninë e Madhe, ku punon prej vitesh.

"Po është e vërtetë që na ka përfshirë kriza në Britaninë e Madhe. Kriza ka prekur vetë britanikët, por dhe ne emigrantët shqiptarë dhe kombësive të tjera edhe më shumë. Sivjet kam sjellë më pak para për familjen time. Shpesoj që kjo krizë të kalojë ashtu siç e kaloi Gjermania dhe Franca, pasi dhe Britania e Madhe është një shtet i fuqishëm".

" Kriza po ndikon dhe në jetën tonë në Britani. Kemi kufizime në shëtitjet tona, në argëtim në të ngrënë dhe në veshje. Kërcënimi për humbjen e vendit të punës është i përhershëm " thotë Luli.

Edhe Urimi, një tjetër emigrant i punësuar në Itali, sjell një panoramë të zymtë nga vendi ku punon. Natyrisht që sivjet ka sjellë më pak para për familjen e tij në Shqipëri.

"Italinë e ka përfshirë kriza prej dy vitesh. Jetojmë më shtrenjtë, paguajmë qeratë e banesave më shtrenjtë dhe gjetja e punës është më e vështirë. Gjithnjë e më pak lekë po sjellim për familjet tona në Shqipëri".

Mungesa e parasë që vjen nga emigracioni ndihet qartë dhe në pakësimin e valutave kryesore të huaja në tregun e këmbimit me monedhën vendase, si dhe kursi i lartë që është ruajtuar sivjet në këmbim me lekun shqiptar.

Kambistët janë në një farë mënyrë njësi matëse për praninë e valutës në treg. Ata shprehen se kriza në vendet ku punojnë emigrantët ndihet shumë dhe në pakësimin e valutave që ata sjellin në Shqipëri.

Sivjet kemi afro 70% më pak valutë në treg se viti i kaluar. Mbi 50% e kambistëve e kanë lënë këtë punë për mungesë të valutës në treg.

Kjo krizë që ka prekur shumicën e ekonomive të vendeve perëndimore, po sjell pasoja dhe në ekonominë e familjeve shqiptarë që bazën mbështetëse të jetësës së tyre e kanë tek puna e emigrantëve.

Të paktën sipas zyrtarëve të qeverisë, ekonomia shqiptare nuk e ka ndierë këtë krizë dhe ka shënuar rritje, ndonëse shumë analistë të ekonomisë dhe opozita thonë se vendi është në krizë ose ajo po troket në Shqipëri.