Vazhdojnë mosmarrëveshjet për zgjedhjet

Kryetari i Partisë Socialiste, Edi Rama ka ripërsëritur sërish kërkesën e partisë që drejton se kjo parti nuk do të njohë rezultatin e zgjedhjeve të përgjithshme parlamentare të 28 qershorit, nëse nuk njihet e drejta demokratike e ligjore për të gjithë kontestimet që ka kjo parti.

Nga ana tjetër në kampin e Partisë Demokratike që e ka shpallur veten fitues, ku dhe po bëhet koalicioni i ri qeveritar me LSI-në, njohja e zgjedhjeve nga opozita është cilësuar si një vendim sovran i saj.

Zëdhënësja e PD-së tha se këto janë përpjekje të kota të Ramës dhe asgjë nuk e ndryshon më votën e shqiptarëve.

Ndërkohë aleati i PD-së tashmë dhe për qeverisjen e vendit, kryetari i LSI-së, Ilir Meta tha se politikanët për hir të karrierave personale nuk mund të luajnë me stabilitetin dhe integrimin e vendit.

Orë pas ore dhe në KQZ vazhdojnë të merren vendime për ankimimet e subjekteve politike pjesëmarrëse në zgjedhjet e përgjithshme parlamentare të 28 qershorit.

Në vendimin e fundit të kundërshtuar nga anëtarët opozitarë të këtij komisioni është hedhur poshtë kërkesa e PS-së dhe PDK-së për rinumërim të disa kutive të votimit në qarkun e Shkodrës duke rinumëruar vetëm një kuti.

Ndërkohë ambasadori amerikan në Tiranë John Withers i ka kujtuar KQZ-së që të mbështesë çdo vendim të tij në Kodin Zgjedhor.