Botuar: E enjte, 16 korrik 2009 - 16:43 CET

Sulm me mjet shpërthyes në Kosovë

Një koktej molotovi është hedhur në oborrin e ndërtesës së qeverisë së Kosovës, ndërsa policia ka gjetur edhe dy mjete tjera të pashpërthyera.

Zëdhënësi i policisë, Besim Hoti tha se dyshohet që sulmi ndaj qeverisë të jetë shkaktuar nga një grup i veteranëve të luftës së ish UÇK-së, të cilët po protestonin para ndërtesës së qeverisë.

“Besohet se këto mjete kanë ndodhur pikërisht nga grupi i protestuesve, por pritet që grupi i hetuesve policorë gjatë hetimeve të identifikojë personat e dyshuar”, tha z.Hoti.

Sipas policisë, ende nuk ka të arrestuar lidhur me këtë incident, i cili përfundoi pa të lënduar dhe pa dëme materiale.

Ndërkohë një anëtar i Këshillit për Mbrojtjen e të Drejtave të ish UCK-së, Vesel Aruqi, ka pranuar se hedhja e mjeteve shpërthyese në oborrin e qeverisë është bërë nga ana e tyre, si formë e revoltës ndaj mospërmbushjes së kërkesave së protestuesve.

Ai ka paralajmëruar se pakënaqësitë e tyre më nuk do t’i shprehin përmes protestës, por në forma tjera, duke mos dhënë më shumë sqarime.

Që nga dita e mërkurë një grup pjesëtarësh të ish UÇK-së kanë filluar të protestojnë duke kërkuar nga qeveria përkujdesje institucionale ndaj veteranëve të luftës.

Shefi i Zyrës për veteranët në Kryeministri, Faik Fazliu, ka thënë se protesta është e panevojshme, pasi sipas tij shqyrtimi dhe plotësimi i Ligjit për vlerat e luftës së UÇK-së është në përfundim e sipër dhe i njejti do të dërgohet për miratim në Kuvend brenda një kohe shumë të shkurtër.