Botuar: E enjte, 09 korrik 2009 - 13:21 CET

Presidenti flet para parlamentit

Presidenti i Kosovës, Fatmir Sejdiu, tha të enjten se rindërtimi i marrëdhënieve me Serbinë është i pamundur për sa kohë që ajo sponsorizon strukturat paralele në veri të Kosovës.

"Rindërtimi i marrëdhënieve me Serbinë është i pamundur sa kohë që Serbia do t’i sponsorizojë strukturat paralele në veri të vendit," tha z. sejdiu.

Ai shtoi se në këto struktura paralele 'ka plot persona të inkriminuar në krime të rënda, të cilët i kanë shumë borxh popullit të Kosovës, por edhe popujve të tjerë të rajonit dhe në rend të parë drejtësisë".

Presidenti pastaj u bëri thirrje serbëve të Kosovës që të integrohen në jetën politike e qytetare në Kosovë.

"Pjesëmarrja e tyre në zgjedhjet lokale të nëntorit të këtij viti, do të ishte një porosi e fuqishme për të ardhmen e përbashkët dhe perspektivën e të gjithëve në Kosovë".

'Faktor i paqes'

Presidenti u bëri thirrje të gjithë personave të zhvendosur që të kthehen në shtëpitë e tyre dhe nënvizoi se Kosova u garanton jetë të qetë dhe të ardhme të sigurt.

Në fjalimin e tij vjetor në parlament, Z. Sejdiu tha se Kosova është e gatshme për marrëdhënie të mira fqinjësore me Serbinë, por me kusht që ajo të heqë dorë nga politikat e destruksionit dhe të shantazheve ndaj Kosovës.

Ai shtoi se Kosova do të mbetet faktor i paqes së qëndrueshme në rajon dhe do të këmbëngulë në ruajtjen e tërësisë tokësore dhe paprekshmërisë së saj.

Bojkot i opozitës

Fjalimi vjetor i presidentit në Kuvendin e Kosovës, është bojkotuar nga përfaqësuesit e dy forcave të mëdha politike opozitare, AAK dhe LDD.

Ata e kanë cilësuar presidentin si 'shkelësin më të madh të Kushtetutës'.

Opozita pretendon se zoti Sejdiu ka vepruar në kundërshtim me Kushtetutën me rastin e zgjedhjeve në Kosovë.

Deputetët e të dyja partive politike, kanë shfaqur pakënaqësinë e tyre me rrjedhën e mbledhjes së Kuvendit dhe moslejimin e debatit pas fjalimit të presidentit.