Botuar: E premte, 03 korrik 2009 - 07:40 CET

OBSH paralajmëron për virusin

Zyrtarja më e lartë e OKB-së për shëndetësinë, Margaret Chan ka thënë se përhapja globale e gripit të derrrave, nuk mund të ndalohej më.

Znj. Chan e bëri këtë deklaratë gjatë punimeve të një forumi që po i zhvillon punimet në Cancun, Meksikë, vendin ku u shfaq fillimisht virusi.

Ajo theksoi se shumica e rasteve me virusin H1N1 ishin të lehta dhe se Meksika tani ishte një vend që mund të vizitohej pa probleme.

Më herët qeveria britanike tha se gripi i derrave nuk mund të mbahej më nën kontroll.

Zyrtarët britanikë thanë se deri nga fundi i muajit të ardhshëm, në vend mund të ketë 100 mijë raste të reja infektimi në ditë.

Këshillë e thjeshtë

Korrespondneti i BBC-së Andy Gallagher, që po ndjek punimet e konferencës tha në fund të ditës së parë së saj, Dr. Chan bëri dy konkluzione.

E para, se tani ishte e pafrutshme që të bëheshin përpjkeje për izolimin e virusit.

Dhe e dyta, drejtuesja e OBSH-së promovoi Meksikën si një destinacion të sigurt pavarësisht nga numri i madh i fataliteteve që pësoi me nisjen e epidemisë para mbi dy muajsh.

Në konferencë marrin pjesë politikanë dhe ekspertë nga mbarë bota, për të parë se cilat janë mësimet e nxjerra deri tani, por këshilla mbetet e njëjtë.

Mënyra më e mirë për të shmangur infektimi është e thjeshtë: laj duart dhe shmang teshtimën e kollitjen në publik.