Kërkohet ndryshim i vendimit të qeverisë

Prodhuesit dhe përpunuesit e mishit në Kosovë kanë protestuar në Prishtinë kundër një vendimi të qeverisë, që nuk u mundëson kompanive vendore të importojnë produkte të mishit.

Qendra e Prishtinës u bllokua të premten për një orë nga rreth 600 kamionë transportues dhe makina tjerë të bizneseve.

Afaristët kosovarë iu përgjigjën në masë protestës së organizuar nga Shoqata e Prodhuesve dhe Përpunuesve të Mishit, e cila është zhvilluar para ndërtesës së Qeverisë dhe Kuvendit të Kosovës dhe përgjatë njërës nga rrugët kryesore të kryeqytetit.

Protestuesit kanë kërkuar anullimin e tenderit ndërkombëtar për përzgjedhjen e një kompanie ndërkombëtare që do të eksportonte produkte të mishit në Kosovë.

Në bazë të një udhëzimi administrativ të qeverisë, asnjë nga kompanitë vendore nuk plotëson kriteret për të konkuruar për këtë tender.

Shoqata e Prodhuesve dhe Përpunuesve të Mishit dhe afaristët e tjerë kosovarë kanë kritikuar qeverinë për favorizimin që po u bën kompanive ndërkombëtare dhe diskriminimin e atyre vendore.

Ata kanë thënë se me vendimin e fundit të qeverisë rrezikohet falimentimi i një numër biznesesh vendore dhe mbyllja e mijëra vendeve të punës.

Pak pas protestës, qeveria përmes një komunikate ka njoftuar se kryeministri ka rekomanduar ndryshimin e Udhëzimit Administrativ për importimin e prodhimeve me origjinë shtazore në partneritet të qeverisë me biznesin vendor.