Z.Berisha tha se me zgjedhjet nuk u arritën "standarte të përsosura"

Ndërkohë, kryeministri Sali Berisha deklaroi se është i hapur për bashkëpunim me opozitën për çështje madhore të vendit.

Edi Rama, kryetari i Partisë Socialiste, partia më e madhe e opozitës, deklaroi të shtunën se zgjedhjet, jo vetëm që nuk i plotësojnë standardet, por janë edhe një alarm për demokracinë shqiptare.

Vetëm një ditë më parë, kryeministri Sali Berisha, kryetar i Partisë Demokratike në pushtet, pohoi se me këto zgjedhje nuk u arritën standarde të përsosura.

Pavarësisht nga kontestimet e opozitës, Berisha tha se ai synon bashkëpunimin me të për cështje madhore të vendit.

Kjo kërkesë është hedhur poshtë nga kreu i Partisë Socialiste, Rama, i cili bëri të ditur se opozita do ta njohë rezultatin, vetëm nëse do të bëhet transparencë me kutitë e votimit të Beratit, Tiranës dhe Shkodrës.

Deklaratat nga të dy kampet politike në Shqipëri, vijnë ndërkohë që në Komisionin Qendror të Zgjedhjeve janë rikthyer polemikat për kutitë e votimit të Fierit dhe është hapur mundësia e rinumërimit të votave, pas një kërkese të Partisë Demokratike për Integrim.

Pas përmbylljes së procesit të ankimimeve pranë KQZ-së, në Kolegjin Zgjedhor të Gjykatës së Apelit në Tiranë kanë mbërritur ankimimet e para të subjekteve zgjedhore, që do të shqyrtohen në seancën e parë të kolegjit, të martën.

Partia Demokratike ka bërë dy ankimime, të dyja për qarkun e Fierit, ndërsa Partia Socialiste ka paraqitur ankimime për Fierin, Beratin dhe Shkodrën.