Nazim Rashidi BBC Shkup

Por disa subjekte politike ndërkohë kanë bërë thirrje që liberalizimi i vizave, i cili mund të hyjë në fuqi pas rekomandimeve, nuk duhet të jetë një zëvendësim për anëtarësimin e plotë në BE të vendit.

Ministrja e Brendshme, Jankullovska e cila është edhe zyrtare e lartë e partisë qeverisëse VMRO DPMNE, tha se do të vazhdohet të punohet edhe për fushat e tjera:

"Ne do të vazhdojmë me reformat pa zvogëluar intensitetin për të gjitha hapat që do të duhet të zbatojmë deri në integrimin e plotë në BE," tha Jankullovska.

Mesazhe të ngjashme dha edhe ambasadori i BE-së në Shkup, Ervan Fuere i cili tha se rekomandimi për heqjen e vizave në fakt duhet të merret si shembull pozitiv:

"Ky është një shembull i mirë për qeverinë, e cila duhet që të demonstrojë të njëjtin vullnet dhe përpjekje për të përmbushur kërkesat e tjera që janë pezull ende, dhe që duhet të përmbushen që vendi të arrijë progres," tha Ambasadori Fuere.

Rekomandmi për heqjen e vizave parashikon udhëtime pa viza në vendet e BE-së veç Britanisë së Madhe dhe Irlandës, por jo dhe mundësi për punësime.

Njerëzit kanë reagime të ndryshme për lehtësimet për udhëtime jashtë shtetit:

"Vizat na kanë ndaluar shumë qarkullimin e lirë," thotë një banor.

"Sa më shumë që qytetarët e Maqedonsië komunikojnë me qytetarët evropianë atëhere vlerat evropiane do të mbërrijnë më shpejt në Maqedoni," tha një tjetër.

"Heqja e vizave faktikisht do të jetë vetëm për të shëtitur, për të studiuar atje nuk do të ketë ndonjë ndryshim, kurse për të shëtitur do të jetë më mirë," tha një shtetas maqedonas.

Ndërmarrja e reformave për plotësimin e kritereve që kërkoheshin për Maqedoninë, zgjatën thuajse një vit e gjysëm, ku pas rekomandimit nga KE, nëse ai miratohet, qytetarët e Maqedonisë do të mund të udhëtojnë pa viza nga fillimi i vitit që vjen.