Violeta Hyseni BBC, Prishtinë

	Solan është në turne në rajon

Kosova është vendi i vetëm që është lënë jashtë këtij procesi, për shkak të mosnjohjes së pavarësisë së saj nga 5 vende anëtare të BE-së.

Gjatë qëndrimit në Prishtinë, z.Solana ka deklaruar se procesi për liberalizimin e vizave do të vazhdojë për të gjitha vendet e rajonit.

Ai ka dhënë këtë shpjegim për lënien jashtë të Kosovës në procesin e negociatave për heqjen e vizave.

“Siç e dini, procesi i liberalizimit të vizave ka filluar para shumë kohësh dhe atëherë Kosova nuk ishte vend kandidat.

Vetëm tri shtete do të përfitojnë nga ky proces në ditët e ardhshme, por ky proces do të vazhdojë edhe në vendet tjera të rajonit”, ka sqaruar përfaqësuesi i lartë i Bashkimit Evropian, Havier Solana.

Proces 'teknik'

Zoti Solana tha se procesi i liberalizimit të vizave nuk ka dimension politik.

“Ky është një proces që ka elemente teknike dhe jo politike, prandaj kur vendet të arrijnë kapacitetet për kontrollimin e kufijve dhe prodhimin e pasaportave biometrike, ato hyjnë në këtë listë dhe kjo do të vazhdojë.

Të gjitha vendet që i kanë plotësuar kriteret do t’u hiqen vizat, ndërsa ato që nuk i kanë plotësuar duhet të presin derisa t’i përmbushin ato.

Ky është një proces që nuk ndalet, por do të vazhdojë”, deklaroi Havier Solana.

Përfaqësuesi i lartë i BE-së foli qartë për perspektivën e integrimit të vendeve të rajonit të Bashkimin Evropian.

Ai tha se Ballkani Perëndimor është një rajon shumë afër BE-së dhe Brukseli dëshiron ta integrojë atë.

Shefi i diplomacisë evropiane tha se heqja e vizave do të bëhet edhe për Shqipërinë, edhe për Bosnjën, pasi të dyja këto vende të plotësojnë të gjitha kriteret e kërkuara nga Komisioni Evropian.

'Vazhdoni punën'

Zoti Solana, i cili erdhi në Prishtinë për herë të dytë pas shpalljes së pavarësisë, tha se kishte parë përparime të mëdha dhe premtoi vazhdimin e ndihmës ndërkombëtare për Kosovën.

Por ai kërkoi nga udhëheqësit kosovarë që të vazhdojnë të punojnë për zhvillimin e vendit.

“Mendoj se një punë e mirë është bërë gjatë kësaj kohe dhe kjo duhet të pranohet. Unë shpresoj që në këtë mënyrë do të vazhdohet të punohet me ndihmën padyshim të BE-së. S

humë organizata dhe njerëz do t'ju ndihmojnë. Jam optimist për mënyrën se si po zhvillohen gjërat, por kjo nuk do të thotë se ju mund të bini në gjumë.

Ju keni detyrim për zhvillimin e vendit, demokracisë dhe të përballeni me sfidat që duhet t’i përballojmë të gjithë në mënyrë kolektive si pasojë e krizës ekonomike”, tha z.Solana.

Shpresa

Presidenti Fatmir Sejdiu dhe kryeministri Hashim Thaçi ndërkaq shprehën bindjen e tyre se e ardhmja e Kosovës është në Bashkimin Evropian dhe në NATO.

Ata thanë se presin që Brukseli t’i hapë rrugën në vjeshtë edhe Kosovës për t’u përfshirë në procesin e liberalizimit të vizave.

Përfaqësuesi i lartë i BE-së, Havier Solana përfundon turneun e tij rajonal me vizitën në Malin e Zi.

Kjo besohet të jetë vizita e tij e fundit në rajon në cilësinë e shefit të diplomacisë evropiane.

Ai qëndroi në Prishtinë në kuadër të një turneu të tij në disa vende të rajonit, para se Komisioni Evropian t’i propozojë të mërkurën zyrtarisht Këshillit të Ministrave heqjen e shpejtë të vizave Shëngen për Maqedoninë, Serbinë dhe Malin e Zi.