Nazim Rashidi BBC Shkup

	Zoti Solana kërkoi angazhim më të madh për zbatimin e Marrëveshjes së Ohrit,se kanë dhe përgjegjësi

Ai deklaroi se qytetarët do të mund të lëviznin më lirshëm.

Angazhimi i zotit Solana në Maqedoni ka qenë i shpeshtë prej disa vjetësh, edhe si Sekretar i Përgjithshëm i NATO-s, por edhe si zyrtar i lartë i BE-së që kryesisht ka pasur si qëllim manaxhimin e krizave, qoftë konflikte apo politike.

Por këtë radhë, ai shkoi në Shkup me siç tha, lajme të mira:

"Në ditët në vazhdim do të keni lajme të mira. Kjo do të ndihmojë njerëzit të vendit tuaj, sidomos të rinjtë që të lëvizin më lehtë në vendet e BE-së,” tha z. Solana

Por ai nuk mund të thonte datën se kur vendi do të fillojë fazën përfundimtare të negociatave për anëtarësim të plotë në BE. Megjithatë zoti Solana tha se po sillte një atmosferë konstruktive.

Përsa i përket çështjes së emrit me Greqinë, ai tha se pas takimeve të fundit që kishte pasur ndërmjetësi i OKB-së në Shkup dhe Athinë, po shfaqej një mundësi për gjetjen e zgjidhjes që duhej shfrytëzuar.

Z. Solana kërkoi nga qeveria një angazhim edhe më të madh për zbatimin e Marrëveshjes së Ohrit, për të cilën siç u shpreh “e kishte pranë zemrës”.

Ai gjithashtu bëri thirrje për angazhimin e vendit në zbatimin e reformave që të afrohej drejt BE-së.

Nga qeveria maqedonase thanë se takimin e konsideronin si pozitiv.

Gjatë qëndrimit të tij në Shkup, z. Solana veç me kryeministrin Nikolai Gruevski, u takua edhe krerët e dy partime të tjera, Ali Ahmetin e BDI-së dhe Branko Cërvenkovskin e LSDM-së në opozitë.