Presidentët nënshkruan tetë marrëveshje

Në ditën e dytë të vizitës në Moskë, presidenti amerikan bëri thirrje për një Rusi të fortë, paqësore e të begatë, që punonte në partneritet me Shtetet e Bashkuara.

Duke folur në një shkollë ekonomike në kryeqytetin rus, z. Obama tha se sfidat me të cilat përballet bota sot, si është përhapja bërthamore, kërkonin partneriter global.

Presidenti amerikan shtoi se ky partneritet do të ishte më i fuqishëm nëse Rusia do të zinte vendin që i takonte në botë si fuqi e madhe.

Ai theksoi rëndësinë e lirisë së fjalës, të drejtës së protestës dhe të mbizotërimit të ligjit dhe shtoi se të gjithë vendet, duke përfshirë dhe Ukrainën e Gjeorgjinë, gëzonin të drejtën e sovranitetit.

Takimi me Putin

Presidenti Obama u takua më herët për herë të parë me kryeministrin rus, Vladimir Putin.

Shumë pak hollësi janë mësuar për atë që u tha në takim.

Takimi i z. Obama me personin që konsiderohet si më i pushtetshmi në Rusi, bëhet në ditën e dytë të vizitës së udhëheqësit amerikan në Moskë.

Njoftohet se presidenti amerikan i tha z. Putin se ishte 'një mundësi e shkëlqyer" për të forcuar marrëdhëniet.

Në ditën e parë të vizitës, z. Obama dhe presidenti rus, Dmitry Medvedev, nënshkruan tetë marrëveshje të ndryshme.

Mes tyre ishte dhe një marrëveshej në parim për të negociuar një pakt të ri për kontrollin e çarmatimit, i cili do të zëvednësonte traktatin 18 vjeçar që njihet si START.

Presidenti rus Medvedev tha se dy udhëheqësit ishin angazhuar pa rezerva për të pakësuar arsenalin e armatimit.

Samit 'novator'

Të dy presidentët e kishin bërë të qartë që më herët se dëshironin një përmirësim dramatik në marrëdhëniet mes dy vendeve të tyre.

Korrespondenti i BBC-së në Moskë, Richard Galpin, thotë se në ditën e parë të këtij samiti novator, duket se ata kanë bërë një hap të rëndësishëm përpara në këtë drejtim.

Një total prej tetë marrëveshjesh të ndryhsme u nënshkruan gjatë një ceremonie në një sallë luksoze të Kremlinit.

Më e rëndësishmja është ajo e angazhimit për të zëvedësuar të ashtuquajturin START, Traktatin e Reduktimit të Armëve Strategjike të cilit i skadon afati në dhjetor.

Plani është që të bihet dakord për një marrëveshje të re, e cila mund ta pakësojë deri në rreth 1500 për secilin vend, numrin e mbushjeve të dislokuara bërthamore.

Presidneti Medvedev po ashtu ra dakord t'i lejonte amerikanët që të transportonin për në Afganistan armë dhe municione përmes territorit rus.