Vlerësimet e Beogradit konsiderohen destruktive nga Prishtina zyrtare

Presidenti Fatmir Sejdiu e ka cilësuar qëndrimin e homologut të tij serb vazhdimësi të polikës destruktive të Serbisë ndaj Kosovës.

“Mendoj se është një provë plus për të dëshmuar qasjen joracionale dhe të padrejtë që ka (Tadiq) edhe ndaj serbëve të Kosovës, sepse në këtë mënyrë ai bën përpjekje t’i mbajë peng lëvizjet e tyre dhe kthimin kah realiteti.

Në të njejtën kohë mund të them se është një qasje që i kundërvihet përpjekjeve të bashkësisë ndërkombëtare për të ndihmuar serbët e Kosovës në kuadër të proceseve të rëndësishme që zhvillon Kosova”, deklaroi presidenti Sejdiu.

Në të njejtën linjë ka qenë edhe reagimi i kryeministrit Hashim Thaçi. Ai ka përsëritur ftesën e tij drejtuar qytetarëve serbë që të dalin në zgjedhje dhe të kontribuojnë për të ardhmën e tyre në Kosovë.

“Mesazhi i presidentit Tadiq është një mesazh i keq që përkon me mentalitetin e politikës së kaluar të Beogradit.

Ne i kemi ftuar serbët që të jenë pjesë e institucioneve dhe janë pjesë e institucioneve, po integrohen në shoqërinë e re demokratike kosovare.

Vet rikthimi i policëve serbë në institucionet e Kosovës tregon se ne po ndërtojmë shtet demokratik, shtet modern, shoqëri multietnike, me perspektivë të sigurtë për t’u integruar në NATO dhe Bashkim Evropian”, u shpre kreu i qeverisë.

Për shefin e grupit parlamentar të Aleancës për Ardhmërinë e Kosovës në opozitë, Ardian Gjini, deklarata e presidentit Tadiq është hapje e një piste për negociim të kushteve për daljen e serbëve në zgjedhje.

Kjo sipas tij është një politikë e gabuar e Beogradit, që shkon në dëm të vet serbëve.

“Është hapje e vijës për negociim të krijimit të kushteve, mendoj se e ka gabim, Kosova nuk duhet të negociiojë më tepër, të gjitha kushtet për pjesëmarrjen e serbëve janë pjekur dhe serbët duhet të jenë vet ata që do të vendosin a do të marrin pjesë në zgjedhje apo jo”, tha deputeti Gjini.

Serbët e Kosovës ndërkaq mbeten të ndarë të dysh sa i përket pjesëmarrjes së tyre në zgjedhje. Kundërshtimi më i ashpër ndaj daljes në votime vie nga përfaqësuesit e serbëve në veri të Kosovës.

Njëri nga ata, Marko Jakshiq e ka vlerësuar të drejtë mesazhin e presidentit Tadiq.

“Mendoj se vendimi i presidentit Tadiq është i drejtë. Ndoshta ai vendim do të ishte i kompletuar sikur t’i ftonte edhe të gjithë serbët që janë në Kuvendin dhe Qeverinë e shtetit të vetshpallur të Kosovës që t’i braktisin ato institucione, kështu që në këtë mënyrë ai do të ishte absolutisht i plotë.

Sidoqoftë unë besoj qe edhe anëtarët dhe simpatizuesit e Partisë Demokratike do ta dëgjojnë presidentin e tyre dhe nuk do të paraqiten në këto zgjedhje, sepse dalja e serbëve në këto zgjedhje do të nënkuptonte që ata do të legalizojnë dhe do të legjitimojnë një krijesë parashtetërore separatiste, me të cilën nuk pajtohet politika e shtetit dhe qeverisë së Serbisë”, ka deklaruar Jakshiq.

Por Sllobodan Petroviq nga Partia Liberale Serbe, e cila është pjesë e Kuvendit dhe Qeverisë së Kosovës, ka qëndrim krejtësisht tjetër. Ai thotë se integrimi i serbëve në institucionet e vendit është rruga e vetme për përmirësimin e jetës së tyre.

“Unë e shfrytëzoj këtë rast që t’u bëjë thirrje të gjithë atyre njerëzve të cilët kanë ndërmend që të jenë pjesë e kësaj shoqërie dhe të kenë ardhmëri më të mirë, duhet thjeshtë të kenë një vision të vetin dhe të luftojnë që e nesërmja të jetë më e mirë. Porosia jonë është që kjo mund të bëhet përmes institucioneve.

Gjithsesi mesazhi i presidentit Tadiq nuk është trimërues për në anën tjetër neve na jep të drejtën që të marrim pjesë më aktive në fushatën për zgjedhjet lokale”, tha z.Petroviq.

Politikanja serbe, Rada Trajkoviq beson se presidenti serb Tadiq nuk do t’i porosisë serbët që të bojkotojnë zgjedhjet e Kosovës.

Sipas saj, deklarata e tij se nuk ka kushte për daljen e serbëve në zgjedhje, bëhet për të kushtëzuar autoritetet ndërkombëtare dhe vendore në Prishtinë që të përmbushin premtimet e tyre për formimin e komunave të reja serbe me procesin e decentralizimit.

“Mendoj se presidenti Tadiq vlerëson se z.Pieter Feith si përfaqësues i lartë i Bashkimit Evropian, institucionet e përkohshme të Kosovës dhe udhëheqja e Prishtinës, janë plotësisht të padrejtë kur bëhet fjalë për procesin e decentralizimit dhe në këtë mënyrë ai po vë kushtet e tij për decentralizimin.

Përndryshe nuk pres që në mënyrë të prerë ai do të jetë kundër zgjedhjeve, në qoftë se plotësohen kushtet dhe ne marrim ato hapësira territoriale si dhe ndërtohet infrastruktura për institucionet që do të formohen me process të decentralizimit”, u shpreh zonja Trajkoviq, e cila mbështet plotësisht daljen e serbëve në zgjedhje.

Zyra Civile Ndërkombëtare, nuk ka pranuar të komentojë qëndrimin e presidentit të Serbisë.

Por zëdhënësi i ICO-s, Andy McGuffie tha për BBC-së se ata dhe qeveria po vazhdojnë përgatitjet për themelimin e komunave të reja që do të udhëhiqen nga serbët.

“Sa u përket zgjedhjeve lokale të nëntorit, Zyra Civile Ndërkombëtare vlerëson se ato janë një mundësi e mirë për të gjithë qytetarët, posaçërisht për komunitetin serb për të ushtruar të drejtën e tyre demokratike dhe për të thënë fjalën e tyre për çështje praktike që janë në interesin e tyre”, tha McGuffie.

Themelimi i pesë komunave të reja me shumicë serbe dhe zgjerimi i një komune ekzistuese të parapara me planin e Ahtisarit, sipas Prishtinës zyrtare do të varet nga gatishmëria e serbëve për të bashkëpunuar me institucionet e vendit dhe pjesëmarrja e tyre në zgjedhje.

Analisti serb, Sllavisha Orloviq thotë se qëndrimi i Beogradit për integrimin e serbëve në institucionet e Kosovës nuk do të ndryshojë përderisa Gjykata Ndërkombëtare e Drejtësisë të mos deklarohet nëse shpallja e pavarësisë së Kosovës ka qenë në kundërshtim me të drejtën ndërkombëtare, siç pretendon Serbia.

“Thjesht bëhet fjalë për atë se në rrethanat kur pritet përgjigjja në kërkesën e Serbisë para Gjykatës Ndërkombëtare të Drejtësisë, dalja e serbëve në zgjedhje do të nënkuptonte integrimin formal të serbëve në institucionet e Kosovës, ndërsa çështje tjetër është të pritet dhe të shihet a ka hapësirë pas vendimit të Gjykatës për të kërkuar një zgjidhje kompromisi.

Kjo është ajo strategjia për të cilën është përcaktuar pala serbe”, tha analisti serb.

Sipas tij, serbët e Kosovës duhet të marrin përgjegjësinë mbi vete dhe të vendosin vet nëse duan të dalin në zgjedhje dhe të integrohen në institucionet e Kosovës.