Vendimi i gjykatës u prit me entuziazëm nga homoseksualët

Gjykata vendosi se krimininalizimi i deritanishëm i homoseksualizmit përbënte shkelje të lirive themelore të njeriut.

Vendimi u prit me entuziazëm nga aktivistët që mbrojnë të drejtat e homoseksualëve.

Korrespondenti i BBC-së në Delhi thotë se sipas të gjitha gjasave ky vendim do të apelohet, pasi India vazhdon të jetë një vend shumë konservator.

Thuajse të gjithë udhëheqësit fetarë në Indi besojnë se homoseksualizmi duhet të jetë i jashtëligjshëm.

Teorikisht, në Indi, personat që ndiqen penalisht për akte homoseksualizmi, mund të dënohen me gjobë apo deri me dhjetë vjet burgim.

Mirëpo, në praktikë shumë pak prej tyre janë dënuar.

Dënimet në disa vende të tjera janë edhe më drastike.

Organizatat që mbrojnë të drejtat e homoseksualëve, thonë se të paktën 80 vende në të gjithë botën e konsiderojnë homoseksualizmin të paligjshëm, 72 prej tyre parashikojnë dënime me burg, ndërsa në pesë vende, në Iran, Mauritani, Arabinë Saudite, Sudan dhe Jemen, është në fuqi dënimi me vdekje.

Dënimi me vdekje është në fuqi në disa zona të Nigerisë dhe Sudanit.

Grupet e të drejtave të njeriut kanë shprehur gjithashtu shqetësim për situatën në Irak ku, sipas tyre, kaosi i viteve të fundit iu ka lënë dorë të lirë skuadrave të vdekjes që të vrasin homoseksualë apo lezbike, pa u ndëshkuar.

Këto grupe thonë se qeveria në Iran vazhdon të ekzekutojë homoseksualë, përfshirë edhe adoleshentë.

Një numër i madh homoseksualësh dhe lezbikesh nga Irani kanë kërkuar azil politik në vende të tjera.

Megjithatë, organizatat që mbrojnë të drejtat e njeriut, thonë se në shumë vende janë shënuar përparime në respektimin e të drejtave të homoseksualëve.

Kina e hoqi homoseksualizmin nga kodi penal në vitin 1997 dhe tani në këtë vend ka shumë klube, bare, apo faqe interneti të homoseksualëve apo lezbikeve.

Gjithashtu, edhe në vendet më të zhvilluara homoseksualët thonë se po fitojnë gjithnjë e më shumë të drejta.

Në regjistrimin e popullsisë vitin e ardhshëm në Shtetet e Bashkuara për herë të parë do të regjistrohen edhe martesat mes personave të të njëjtit seks.

Grupet që bëjnë fushatë për të drejtat e homoseksualëve, thonë se kjo do t'i hapë sytë e amerikanëve për numrin e vërtetë të homoseksualëve dhe lezbikeve që jetojnë në Shtetet e Bashkuara.