Violeta Hyseni BBC Prishtinë

	Freedom House vlerëson arritjet në Kosovë

Sipas Freedom House, zbatimi i suksesshëm i planit të Ahtisarit ose do të forcojë funksionalitetin e shtetit të Kosovës, ose do të rrisë mundësinë e ndarjes përgjatë lumit Ibër në Mitrovicë.

Në raportin e saj për vendet në trazicion, organizata thotë se aftësia e funksionimit të EULEX-it do të ruajë rol të drejtëprejtë në konsolidimin e shtetit dhe suksesin e misionit të BE-së.

Lufta kundër korrupsionit, forcimi i institucioneve, ndërtimi i një Kosove të integruar si dhe vendosja e bazave për zhvillimin ekonomik, cilësohen si sfida tjera të Kosovës këtë vit.

Duke analizuar gjendjen vitin e kaluar, Freedom House vëren përparime në qeverisjen lokale dhe atë qëndrore.

Kryeministri Hashim Thaçi lavdërohet për ruajtjen e stabilitetit dhe parandalimin e dhunës në Kosovë, të arritura këto që thuhet të jenë bërë në saje të ndihmës së dhënë nga Zyra Civile Ndërkombëtare, Bashkimi Evropian dhe ambasada amerikane në Prishtinë.

Po ashtu vlerësohet miratimi i ligjeve që dalin nga paketa e Ahtisarit.

Ndërsa një nga pikat më të dobëta të shtetit ligjor në Kosovë, sipas Freedom House është gjyqësori.

Raporti thotë se kuadri ligjor i Kosovës mbetet i ndarë mes rregullave të UNMIK-ut, ligjeve të miratuara nga Kuvendi në përputhje me Kushtetutën e re, disa ligjeve të ish-Jugosllavisë dhe ligjeve serbe përmes strukturave paralele në zonat me shumicë serbe, veçanërisht në veri, gjë që ka penguar funksionimin e gjyqësorit.

Problem i madh në Kosovë, vlerëson Freedom House, vazhdon të jetë edhe korrupsioni.

Organizata thotë se ndonëse ka pasur përmirësim në legjislacion, ka në përgjithësi një mungesë të vullnetit politik për të luftuar korrupsionin.