Richard Galpin BBC, Moskë

	Shpresohet që samiti të dalë me marrëveshje për rifillimin e dialogut

Takimi u krye në kohën kur janë rritur tensionet mes Moskës dhe Brukselit për një listë të gjatë çështjesh, përfshirë dhe përpjekjet e Evropës për të forcuar marrëdhëniet me vendet si Ukraina dhe Gjeorgjia.

Vit i vështirë

Presidenti rus, Dmitry Medvedev shprehu shqetësim lidhur me vullnetin e Bashkimit Evropian për të forcuar marrëdhëniet me vendet si Ukraina dhe Gjeorgjia, duke thënë se kjo nuk duhet përdorur kundër Rusisë.

Zoti Medvedev tha se nuk donte që programi për Partneritetin Lindor të BE-së të inkurajonte atë që ai e quajti prirjen anti-ruse në disa shtete.

Ai po fliste ne fund të samitit mes Rusisë dhe BE-së që u zhvillua në Kabarovsk në Rusinë lindore.

Një vit më parë kur Dimitry Medvedev u bë presidenti i ri i Rusisë pati shpresë se marrëdhëniet me Bashkimin Evropian mund të përmirësohen në mënyrë graduale.

Në vend të kësaj, këto marrëdhënie u pëkeqësuan në mënyrë të vazhdueshme.

Ato u acaruan verën e kaluar gjatë luftës së shkurtër mes Rusisë dhe Gjeorgjisë.

Që prej asaj kohe, ka patur një tjetër debat për gazin mes Rusisë dhe Ukrainës që çoi në ndërprerjen e furnizimeve për shumë vende evropiane për dy javë në mes të dimrit.

Nga ana tjetër, ekziston edhe një betejë e vazhdueshme lidhur me shpërndarësit e energjisë teksa Evropa përpiqet të gjejë alternativa përballë rritjes së varësisë ndaj gazit rus.