KQZ-ja i ka kthyer listat e dy partive kryesore

Pika pesë e nenit 67 të Kodit Zgjedhor shkruan se në çdo zonë zgjedhore të paktën 30 për qind ose një në tre emrat e parë duhet t'i përkasin gjinisë femërore.

Kreu i KQZ-së, Arben Ristani tha se partitë politike kanë të drejtë të ndryshojnë listat deri në momentin e fundit kur KQZ të marrë vendim përfundimtar për to.

Zyrtarë të këtij komisioni kanë kujtuar ndërkohë se Kodi Zgjedhor parashikon edhe sanksione për këtë shkelje.

Sipas nenit 175, për moszbatim të nenit 67, në çdo rast vendoset 30 mijë lekë gjobë.

Rishikimi i listave për të zbatuar raportet midis gjinive që kërkon ligji, mund të shërbejë edhe si një rast i mirë për partitë politike që të sheshojnë dhe pakënaqësitë brenda radhëve të tyre, të cilat janë provokuar pas shpalljes së listave me emrat e kandidatëve për deputetë.

Debate

	Selia e PS-së në Tiranë

Procesi i hartimit të listave ka ngjallur debate në skenën politike.

Më së shumti duket se në tërë këtë proçes, në dyshim është vënë mënyra e hartimit të këtyre listave.

Por zyrtarë të lartë të PD-së dhe PS-së vlerësojnë se proçesi brenda selive të tyre ka qenë transparent.

Nënkryetari i PD-së Astrit Patozi është mjaft i sigurtë. “100 për qind transparent," i tha Patozi BBC-së.

“Vetë kreu i PD-së, jo në limitin kohor të KQZ, bëri të ditur jo vetëm para partisë së tij, por çdo qytetari të saj listën përfaqësuese me të cilën PD shkon në zgjedhjet e 28 qershorit”.

Nga ana e saj, edhe Arta Dade, një nga emrat kryesorë të socialistëve thotë se në kampin rozë hartimi i listave ka qenë mjaft transparent.

”Lista ka finalizuar një proçes transparent që ka lidhje me gjithë proçesin e ristrukturimit dhe konfigurimin e figurave të spikatura të PS që pranohen nga opinioni,” tha zonja Dade.

Por analisti Shpëtim Nazarko nuk ka të njëjtin mendim për mënyrën e hartimit dhe shpalljes së këtyre listave.

Sipas tij “gjithçka është bërë për interesa taktike të partive për të bllokuar kundërshtarin, tamam si në një ndeshje futbolli,“ i tha zoti Nazarko BBC-së.