Violeta Hyseni BBC, Prishtinë

Zyrtarë të qeverisë së Serbisë kanë thënë se do t’i dorëzojnë UNMIK-ut një plan për shlyerjen e borxhit të energjisë elektrike që kanë serbët e Kosovës.

Korporata Energjetike e Kosovës prej disa ditësh i ka lënë pa energji elektrike disa vendbanime serbe, për shkak të mospagesës së rrymës së shpenzuar.

Qeveria i Serbisë i ka dërguar një notë proteste UNMIK-ut, për shkak të problemeve me mosfurnizimin e serbëve me energji elektrike, kanë njoftuar mediat serbe.

Beogradi zyrtar ka ofruar formimin e një ndërmarrje të vecantë për furnizimin me energji elektrike të vendbanimeve serbe në Kosovë.

Sekretari i Shtetit në Ministrinë Serbe për Kosovën, Oliver Ivanoviq ka thënë se qeveria e Serbisë do t’ia dorëzojë një plan UNMIK-ut për shlyerjen e borxhit të energjisë elektrike që kanë serbët e Kosovës.

Por zyrtarë të KEK-ut thonë se për këtë cështje nuk dëshirojnë marrëveshje me Serbinë, por vetëm me konsumatorët serbë.

Zëdhënësi i KEK-ut, Viktor Buzhala ka thënë se i vetmi autoritet që mund t’i furnizojë të gjithë konsumatorët me energji elektrike është Korporata Energjetike e Kosovës.

Ai ka theksuar se nuk do të ketë furnizim me energji elektrike, derisa nuk arrihet marrëveshje me konsumatorët serbë për pagesën e borxhit.

Udhëheqësit kosovarë ndërkaq kanë kërkuar që të mos politizohet problemi i furnizimit me energji elektrike në zonat e banuara me serbë.

Presidenti Fatmir Sejdiu ka thënë se të gjithë qytetarët e Kosovës, pavarësisht nga përkatësia etnike, kanë të njëjtat obligime ndaj institucioneve dhe kompanive të vendit.