Violeta Hyseni BBC Prishtinë

Banorët serbë të këtyre enklavave kanë kërkuar rikyçjen në rrjetin elektrik pa kurrfarë kushtesh.

Korporata Energjetike e Kosovës e ka arsyetuar ndërprerjen e energjisë elektrike në vendbanimet serbe me borxhin e madh të konsumatorëve.

Që pas përfundimit të luftës, serbët në Kosovë nuk e paguajnë energjinë elektrike dhe borxhet e tyre, sipas zyrtarëve të KEK-ut, kapin shumën prej 120 milionë euro.

Protestuesit serbë u kanë bërë thirrje zyrtarëve në Beograd që të bëjnë çfarë është e mundur që t’u sigurojnë furnizim të rregullt me energji elektrike.

Protestat e serbëve në fshatin Shillovë të Gjilanit po mbahen prejh disa ditësh, ndërsa protesta e të dielës kaloi me incidente pas përleshjeve ndërmjet protestuesve dhe policisë, që rezultoi me të lënduar nga të dyja anët.

Ministri serb për Kosovën, Goran Bogdanoviq ka thënë se ndërprerja e energjisë elektrike nga ana e Prishtinës zyrtare është presion politik që bëhet ndaj serbëve të mbetur në Kosovë.

Por këto deklarata janë hedhur poshtë nga përfaqësues të institucioneve të Kosovës dhe të Korporatës Energjetike të Kosovës, të cilët kanë thënë se të gjithë konsumatorët, pavarësisht përkatësisë së tyre etnike, duhet të paguajnë energjinë e shpenzuar.