Palët akuzojnë njëra tjetrën për mosfurnizimin me gaz

Të martën, Moska dhe Kievi shkëmbyen sërish akuza për bllokimin e furnizimit me gaz, vetëm pak orë pasi kompania ruse e naftës Gazprom, njoftoi se e kishte rifilluar furnizimin me gaz.

Rusia thotë se Ukraina e ka bllokuar kalimin tranzit të gazit që vjen nga Rusia.

Nga ana e saj Ukraina vazhdon të akuzojë Moskën për situatën e krijuar në furnizimin me gaz.

Presidenti Jushçenko e mbrojti qëndrimin e vendit të tij në një fjalim që mbajti të martën në televizion.

Ai tha se Ukraina nuk kishte hedhur asnjë hap për të penguar kalimin e gazit rus drejt Evropës.

"Ukraina ka qenë dhe do të jetë një vend tranziti i besueshëm dhe nuk ka bërë ndonjë gjë për të ndaluar furnizimin me gaz të vendeve të Evropës. Ne nuk kemi marrë qoftë edhe një metër kub gaz të vetëm nga sistemi", tha presidenti Jushçenko, duke reaguar kështu ndaj akuzave të Rusisë se Ukraina, si vend tranzit, ka vjedhur një sasi të gazit që ka qenë e destinuar për konsumatorët evropianë.

Këto akuza dhe kundërakuza po shihen me shqetësim nga qindra mijë vetë në Evropën Lindore dhe Juglindore, të cilët kanë mbetur pa ngrohje prej disa ditësh.

Bashkimi Evropian, i cili ka dërguar vëzhgues në terren, shprehu zhgënjim për faktin se situata është e bllokuar.

Në një bisedë telefonike me kryeministrin rus Vladimir Putin, Presidenti i Komisionit Evropian, Jose Manuel Barroso, shprehu gjithashtu shqetësim për faktin se vëzhguesit evropianë, që janë dërguar në rajon si pjesë e marrëveshjes për zgjidhjen e krizës, nuk janë lejuar në të gjitha sallat e kontrollit të furnizimit me gaz si në Rusi ashtu edhe në Ukrainë.