Ai tha se Kosova është një vend i qëndrueshëm dhe me një vizion të qartë për të ardhmen e saj.

Deklaratat e presidentit pasuan një letër të presidentit serb, Boris Tadiq, drejtuar Këshillit të Sigurimit të OKB-së dhe BE-së, me të cilën akuzohen KFOR-i, EULEX-i dhe UNMIK-u se nuk kanë reaguar me kohë në parandalimin e siç është shprehur ai, sulmit mbi serbët.

Presidenti serb ka thënë se autoritetet e Kosovës dhe ekstremistët shqiptarë po përpiqen që me dhunë të provokojnë konflikte me serbët.

Por presidenti i Kosovës, Fatmir Sejdiu ka deklaruar se Kosova e mirëpret shtrirjen dhe funksionet e misionit evropian për drejtësi dhe polici në gjithë territorin e saj përfshirë edhe rolin e trupave paqeruajtëse.

Gjendja në Mitrovicë ndërkaq vazhdon të jetë e tensionuar.

Dy grupe shqiptarësh dhe serbësh sërish janë mbledhur mbrëmë në Suhodoll të Mitrovicës, pas një incidenti kur dy makina, një e pronarit shqiptar e tjetra e atij serb, janë dëmtuar nga persona të panjohur.

Policia e Kosovës, e pjesës veriore dhe asaj jugore, ka arritur që të ndajë grupet e qytetarëve, dhe të normalizojë gjendjen.

Situata e krijuar në veri ka qenë pjesë e diskutimeve të udhëheqësve institucionalë të Kosovës dhe të drejtuesve të mekanizmave ndërkombëtarë të sigurisë.

Autoritetet thanë se reagimi i përbashkët i Policisë së Kosovës, Policisë së EULEX-it dhe forcave të KFOR-it gjatë incidenteve të fundit në veri të Mitrovicës ishte përgjigje mjaftueshme ndaj provokimeve për të nxitur tensione.

Ata u bënë thirrje qytetarëve që të ruajnë qetësinë dhe ripërsëritën qëndrimin se nuk do të tolerohet dhuna.

Ndërkohë, udhëheqja serbe e qytetit të Mitrovicës, ka vendosur të krijojë një shtab të krizës, dhe u ka bërë thirrje qytetarëve, vecanërisht të rinjëve, që të përmbahen nga çdo lloj dhune.

Kryetari i Kuvendit Komunal të Mitrovicës së veriut, i emëruar pas zgjedhjeve serbe në maj të vitit të kaluar, Nenad Topliçevic, tha se udhëheqja lokale do të punojë në stabilizimin e gjendjes në qytet dhe në ruajtjen e paqes.