Situata është krijuar nga mosmarrëveshjet e Rusisë me Ukrainën

Bosnje Hercegovina, Bullgaria, Kroacia, Greqia, Hungaria dhe Maqedonia, njoftuan se furnizimi që kryhet me anë të tubacionit që kalon përmes Ukrainës, ishte ndërprerë në orët e para të mëngjesit të së hënës.

Disa vende të tjera si Italia dhe Austria thanë se po merrnin vetëm 10% të kuotave të zakonshme të furnizimit me gaz.

Kompania rumune e gazit, Transgaz, njoftoi se furnizimi me gaz nga Rusia kishte rënë më shumë se 30%.

Ankesa ka pasur edhe nga Polonia dhe Hungaria.

Bashkimi Evropian e quajti krejtësisht të papranueshme uljen e ndjeshme të furnizimit të disa vendeve evropiane me gaz nga Rusia.

Deklarata e Bashkimit Evropian e quante shkelje të angazhimit që kishin marrë autoritetet ukrainase dhe ato ruse për furnizimin me gaz të vendeve Evropiane.

Përmes kësaj deklarate, Bashkimi Evropian kërkoi rifillimin e furnizimit me gaz nga Rusia në nivelin e mëparshëm.

Mosmarrëveshje ruso-ukrainase

Mosmarrëveshjet mes Rusisë dhe Ukrainës që kanë shkaktuar këtë krizë në furnizimin me gaz kanë lindur për shkak të çmimit të gazit dhe pagesave të prapambetura të Ukrainës.

Çdo vit të dyja vendet negociojnë kontratat e furnizimit me gaz.

Por deri në mesnatën e 31 dhjetorit, Moska dhe Kievi nuk arritën marrëveshje për çmimin e gazit për këtë vit.

Çmimi filletar që ofroi Gazpromi, kompania shtetërore ruse e energjisë, ishte 418 dollarë për 1000 metra kub gaz.

Ky çmim u ul më pas në 250 dollarë, por Ukraina e refuzoi dhe ofroi 235 dollarë.

Për ironi, bisedimet u kthyen nga kishin nisur pasi Gazpromi iu kthye ofertës së tij fillestare, duke kërkuar 418 dollarë për 1000 metra kub gaz.

Përveç kësaj, Gazpromi thotë se Ukraina i detyrohet kësaj kompanie ruse rreth dy miliardë dollarë në fatura të papaguara bashkë me kamatën për vonesën e shlyerjes së pagesave.

Ukraina thotë se nuk mund ta përballojë çmimin e gazit që kërkon Rusia dhe ka paralajmëruar se ndërprerja e furnizimit të Ukrainës me gaz nga kompania Gazprom mund të shkaktojë probleme edhe në eksportin e gazit përmes Ukrainës.

Ukraina përdor të njëjtin tubacion gazi si për furnizimin me gaz brenda vendit ashtu edhe për kalimin tranzit të gazit nga Rusia drej vendeve të tjera evropiane.

Kompania shtetëtore ruse Gazprom kontrollon afro një të tretën e rezervave botërore të gazit dhe mbulon afro një të katërtën e sasisë së gazit në Evropë.

Alternativat e Evropës

Prej kohësh vendet evropiane po shohin mundësinë e ndërtimit të një tubacioni gazi alternativ, për të ulur varësinë e furnizimit me gaz nga Rusia.

Ekziston projekti Nabuco i Bashkimit Evropian, për kalimin e tubacionit të gazit nga Azia Qendrore përmes Turqisë.

Por ai nuk mund të plotësojë kërkesën për gaz për të gjithë anëtarët e Bashkimit Evropian.

Kjo do të thotë se Evropës i duhet Gazpromi.

Qeveritë dhe kompanitë evropiane janë angazhuar në projekte të ndryshme me kompaninë shtetërore ruse, e cila ka projekte për ndërtimin e tubacioneve që do ta anashkalonin Ukrainën.

Një ndër partnerët më të mëdhenj evropianë të Gazpromit është
gjigandi italian ENI.