Bombardimet kanë vrarë qindra vetë dhe plagosur shumë të tjerë

E përditshmja THE GUARDIAN shkruan se Izraeli duket i vendosur të nxjerrë Hamasin jashtë Gazës.

Zyrtarët po përpiqen të ndryshojnë rregjimin atje, shkruan gazeta që ka si nëntitull "partia islamiste është e dëmtuar fatalisht".

Gazeta hapet me fotografinë e një babai që është duke qarë me ngashërim përballë kufomave të tre fëmijëve të tij të vegjël që u vranë nga zjarri i tankeve izraelite.

Në shkrimin që shoqërohet nga kjo fotografi, autori shkruan se kryeministri izraelit kishte premtuar "një grusht të hekurt për Hamasin dhe tha se do t'i trajtonte civilët me dorashka të mëndafshta, por palestinezët më shumë se të tjerët e dinë se në luftë përdoren pak dorashka mëndafshta.

E përditshmja në një artikull ku analizohen taktikat ushtarake shkruan se leksionet nga lufta e Libanit mund të shfrytëzohen por madje edhe armët më të softistikuara vrasin civilë.

THE GUARDIAN duke raportuar për përpjekjet diplomatike që po bëhen për zgjidhjen e krizës shkruan se presidenti Sarkozy drejton përpjekjet ndërkombëtare për t'i dhënë fund dhunës, ndërsa Turqia ka ofruar që ta çojë në Kombet e Bashkuara një marrëveshje armëpushimi.

Presidenti Sarkozy ndodhet në rajon në një mision të veçantë ai shkon në Siri që është mbështetësja kryesore e Hamasit në mesin e vendeve arabe.

E përditshmja THE TIMES, përqëndrohet tek kërcënimi i liderëve të Hamasit për të vrarë hebrenjtë jashtë vendit.

Teksa luftimet intensifikoheshin në Gazë, udhëheqësi i Hamasit tha se islamistët do të vrisnin fëmijët hebrenj kudo që të ishin në botë në shenjë hakmarrjeje për sulmin shkatërrues në Gazë.

"Ata kanë legjitimuar vrasjen e fëmijëve të tyre duke vrarë fëmijët e Palestinës", tha Mahmud Zahar gjatë një transmetimi televiziv nga një vendstrehim sekret.

Gazeta THE TIMES, shruan se grupet e hebrenjve thanë dje se pushtimi i Gazës kishte provokuar një rritje të kërcënimeve antisemite dhe dhunës në Londër dhe Mançester.

Gazeta përmend si incidentin më serioz, një përpjekje për t'i vënë zjarrin një sinagoge në veriperëndim të Londrës.

Në lajme të tjera në shtypin e sotëm britanik:

THE DAILY TELEGRAPH shkruan për krizën energjitike në Evropë pasi Putini uli furnizimet me gaz.

Evropa u zhyt një një krizë energjitike kur Vladimir Putini urdhëroi kompaninë shtetërore të gazit, uljen e furnizimeve me 20 për qind.

Kur temperaturat në pjesën më të madhe të kontinentit ranë nën zero, kryeministri urdhëroi Gazpromin që të fillonte uljen.

Ky vendim thotë e përditshmja u bë me qëllim që të ndëshkohej Ukraina fqinje, të cilën Rusia e akuzon se po harxhonte energjinë e gazjellësve që furnizonin vendet të tjera evropiane.

Naftogaz e Ukrainës tha se pasojat e vendimit të Moskës do të ndiheshin në vendet evropiane përfshirë edhe Britaninë.

E përditshmja THE INDEPENDENT shkruan për afrimin e fillimit të mandatit të presidentit të zgjedhur Obama, duke marrë shkas nga fakti që vajza e tij e vogël Sasha filloi simestrin e parë në Uashington.

Familja Obama po qëndron në Hotelin Hay Adams përpara se të shkojë në shtëpinë e pritjes në Shtëpinë e Bardhë më 15 janar.

E përditshmja shkruan se si vajzat e presidentit u çuan në shkollë pa tërhequr vëmendje.

Vetë presidenti mbërriti në kryqytet pa bujë dhe ndihmoi për t'u siguruar të bijave një tranzicion sa më të lehtë në shkollë.

Largimi I tij nga Çikago ishte edhe ai i vetmuar, gjë që solli ftohtësinë e sfidave që e presin përpara presidentin e ri.

Në faqen e parë e përditshmja THE TIMES ka presidentin e zgjedhur me të bijën Sasha, ndërsa si titull mban "as shenjë nervozismi për mandatin e ri të Obamës.

E përditshmja shkruan se presidenti i zgjedhur fillon punën me një recetë me vlerë 775 miliard dollarë për ekonominë e sëmurë.