Robert Goro BBC Athinë

	Një oficer policie i plagosur tashmë është jashtë rrezikut

Automatiku kalashnikov ishte përdorur më 23 dhjetor të vitit të kaluar, kur ishte qëlluar dy herë një autobus që transportonte pjesëtarë të forcave speciale të policisë greke.

Ndërsa pistoleta e kalibrit 9 m ishte përdorur gjatë sulmit kundër një rajoni policie në Athinë, në prill të vitit të kaluar.

Drejtori i përgjithshëm i policisë greke, Vasilis Tsiaturis, iu referua përvojës së tij për të thënë se pas sulmit të së hënës ndodhen njerëz që siç tha, nuk dolën befasisht.

"Ata kishin diçka ndërmend dhe gjetën rastin me ngjarjen tragjike të vrasjes së 15 vjeçarit Aleksis Grigoropulos, për të shprehur atë që kishin ndër mend", tha drejtori i përgjithshëm i policisë greke, duke sqaruar se nuk ka asnjë provë që ta vërtetojë pohimin e tij.

Ngjarja ndodhi në lagjen Eksarqia që është sanskionuar prej vitesh si qendra e forcave antipushtetare të çfarëdo ngjyrimi politik.

Në të njëjtën lagje kishin nisur edhe trazirat e 6 dhjetorit, që e zhytën vendin në një gjendje kaosi për katër ditë rresht.

Përkundër praktikave të deritanishme, ku policia ka preferuar të mos ndërhyjë gjatë incidenteve, drejtori i përgjithshëm i policisë tha se posaçërisht në lagjen Eksarqia, do të veprohet ashtu siç duhet, në përputhje me ligjet.

Ndërsa polici i plagosur ka dalë jashtë rrezikut për jetën, kryeministri Kostas Karamanlis e vizitoi atë, ndërsa më parë kishte shkuar dhe në vendin e ngjarjes.

Duke bashkuar indinjatën e tij me ndjenjat e siç tha të çdo greku e grekeje, kryeministri theksoi se plumbat kundër policëve janë plumba kundër demokracisë dhe shoqërisë.

“Dua të dërgoj një mesazh të qartë te të gjithë. Demokracia jonë është e fortë, shteti ligjor është garancia më e fuqishme për çdo qytetar. Nuk do të lejojmë askënd që të vejë në diskutim këto vlera që janë fituar me luftra dhe sakrifica të mëdha”, përfundoi kryeministri.

Në kohën që është paralajmëruar rifillimi i protestave për datën 9 janar, shumëkush këtu druhet se policia do ta ashpërsojë qëndrimin e saj ndaj protestuesve.

Sipas disa analistëve, ky qëndrim i ashpër mund të motivohet emocionalisht me rastin e incidenteve si ky i të hënës, ku policia të justifikohet se rrezikohet integriteti fizik dhe jeta e pjesëtarëve të saj.

Disa analistë të tjerë theksojnë se me pretekstin e masave kundër terrorizmit, qeveria mund të ashpërsojë legjislacionin, çka vlerësohet se do të kishte ndikim negativ në funksionimin e demokracisë, dhe një kundër reagim akoma më të ashpër nga grupet guerrilase apo anarkistët.