Izraeli po e sulmon Rripin e Gazës nga ajri, toka dhe deti

Flota ushtarake mbështeti fushatën e bombardimit nga toka dhe ajri mbi pjesën veriore të Gazës, ndërsa trupat e këmbësorisë vazhduan të avanconin brenda territorit të Gazës.

Luftimet duket se po zhvillohen më në brendësi të Rripit të Gazës.

Korrespondenti i BBC-së, Mike Sergeant, i cili ndodhet në kufirin mes Izraelit dhe Gazës, thotë se tymi që ngrihet mbi Gazë mund të shihet që nga kufiri.

Ai thotë se tanket izraelite dhe armatimet e rënda duket se kanë zënë pozicion në të dy anët e qytetit të Gazës, duke e ndarë praktikisht Rripin e Gazës në tri pjesë.

Ministria palestineze e shëndetësisë tha se 30 vetë janë vrarë që kur Izraeli ndërmori ofensivën tokësore të shtunën në mbrëmje.

Njoftimet e fundit thonë se 470 palestinezë janë vrarë që prej fillimit të ofensivës izraelite nëntë ditë më parë.

Katër izraelitë janë vrarë nga sulmet me raketa të militantëve palestinezë.

Komandantët e ushtrisë izraelite thanë se ofensiva e tanishme ishte ende në fazen e saj të hershme.

Por, ata thanë se që prej fillimit të kësaj ofensive, numri i raketave të lëshuara nga militantët palestinezë drejt territorit izraelit ishte ulur në mënyrë të ndjeshme.

Misioni evropian

Një mision i Bashkimit Evropian po viziton kryeqytetin e Egjipitit, Kajro, në një përpjekje për të arritur në marrëveshje armëpushimi mes Izraelit dhe Hamasit.

Misioni evropian në Lindjen e Mesme kryesohet nga ministri i jashtëm çek, Karel Schwarzenberg, vendi i të cilit mban presidencën e radhës të Bashkimit Evropian.

Shefi i Bashkimit Evropian për politikën e jashtme dhe sigurinë, Havier Solana, tha se ashpërsimi i konfliktit mes Izraelit dhe Hamasit shënonte dështimin e diplomacisë.

"Për momentin mund të themi se diplomacia ka dështuar me pasoja shumë serioze. Unë mendoj se armëpushimi nuk është i pamundur, prandaj duhet të bëjmë të gjitha përpjekjet për ta arritur", tha zoti Solana.

Pas bisedimeve në Kajro, delegacioni evropian do të takohet me udhëheqësit izraelitë në Jeruzalem dhe më pas me udhëheqjen palestineze në qytetin Ramallah të Bregut Perëndimor.

Reagimet e vendeve arabe

Udhëheqësit e dy vendeve të vetme arabe që kanë traktate paqeje me Izraelin e kanë dënuar ofensivën e fundit në Rripin e Gazës.

Në një njoftim të dalë nga zyra e presidentit egjiptian, Hosni Mubarak, thuhet se Izraeli duhet t'i japë fund pushtimit të Gazës menjëherë dhe pa kushte.

Edhe mbreti i Jordanisë Abdullah, i bëri thirrje Izraelit që t'iu japë fund sulmeve.

Ai tha se sulmet nuk mund të garantonin sigurinë e Izraelit.

Sekretari i Përgjithshëm i Lidhjes Arabe, Amr Musa, akuzoi bashkësinë ndërkombëtare se nuk po bënte aq sa duhej për t'i dhënë fund këtij konflikti.

"Pranimi i kësaj situate nga vendet arabe nuk është alternativë. Alternativë është që të qënddrojmë të vendosur ndaj këtij agresioni. Askush nuk po vepron edhe pse ka një numër të madh viktimash në radhët e civilëve palestinezë. Bota i ka hedhur sytë në një drejtim tjetër" tha Sekretari i Përgjithshëm i Lidhjes Arabe, Amr Musa.