Arbër Vllahiu BBC Prishtinë

Ministri Pajaziti tha se mosfunksionimi i dy pikave kufitare në veri, ka krijuar një mjedis për ushtrimin e kontrabandës dhe të krimit.

Dy poste kufitare në veri të Kosovës u dogjën dy ditë pas shpalljes së pavarësisë së saj, në shkurt të këtij viti, në shenjë proteste të serbëve lokalë.

Pikat kufitare me Serbinë, pas tërheqjes së doganave të Kosovës, mbi nëntë muaj nuk janë kontrolluar dhe autoritetet në Prishtinë dhe ato në Beograd kanë vlerësuar se për shkak të veprimeve joligjore, humbjet për buxhetet e tyre janë të mëdha.

Kontrolli në dy pikat kufitare është rivënë pas shtrirjes së misionit evropian për drejtësi dhe polici, EULEX, i cili është vendosur edhe në veri të Kosovës.

Por drejtues të opozitës e kanë kritikuar udhëheqjen aktuale në Kosovë për siç kanë thënë mungesë të vizionit shtetformues dhe paaftësisë për të gjetur një zgjidhje për veriun e Kosovës.

Ndërkohë, ministri Pajaziti tha se sfidë e madhe për Ministrinë e Brendshme ka qenë edhe veprimi i grupeve të caktuara në veri të Kosovës me qëllim të, siç vlerësoi, krijimit të incidenteve në vend.