Pinter njihej dhe si aktor e regjisor

Ai prej vitesh po mjekohej për kancer.

Harold Pinter shkëlqeu si aktor, skenarist dhe regjisor, por ishin dramat e tij që patën efektin më të madh, aq sa mbiemri "pinteresk" madje u fut ne fjalorin e gjuhes angleze të Oksfordit.

Në tetor të 2005-s, ai mori Çmimin Nobel për Letërsi.

Harold Pinter kaloi disa vjet si aktor profesionist para se drama e tij e parë "Birthday Part" të shfaqej në Londër dhe të kritikohet rreptë nga thuajse te gjithë kritikët përveç njerit, Harold Hobson. Por shfaqja e tij e radhes "Caretaker," për një të pastrehë që pranon një ofertë për strehim të përkohshëm, shënoi sukses të menjëhershëm.

Ai thoshte se nuk mund të analizonte veprat e veta, por hodhi poshtë idenë se pauzat e tij "Pintereske" nënkuptonin që personazhet e tij nuk ishin në gjendje të komunikonin.

Ata, thoshte ai, ishin tepër të pasigurtë që të shpalosnin ndjenjat e tyre.

"Heshtja si e kuptoi unë është heshtje e frikës, frikë nga njohja, frikë nga njohuria, vërtetë. Frikë jo vetëm nga njohja prej të tjerëve por edhe nga njohja e të tjerëve. Frikë nga intimiteti," thoshte vetë Pinter.

Veshi i Pinterit për dialog e bëri atë skenarist të talentuar, sidomos në bashkëpunimet me regjisorin Joseph Losey në filmat si "The Servant", "The Accident" dhe "The Go-Between".

Dashuria e tij për gjuhën ishte e kahmotshme dhe kohë pas kohe ai i kthehej edhe aktrimit.

Gjatë gjithës së tij, Pinter ishte i angazhuar në shprehjen e pakënaqësisë politike: si kundërshtar i shërbimit ushtarak ai u gjobit gjatë Luftes së Ftohtë.

Në tetor 2005, fitoi Çmimin Nobel për Letërsi. Ndonëse në këtë kohë nuk ishte mirë me shëndet për të marrë pjesë në ceremoni, fjalimi i tij i regjistruar me rastin e pranimit të çmimit tregoi se ai nuk e kishte humbur pasionin e tij për politikë.

"Ne kemi sjellur torturë, bomba kasetë, uranium të varfëruar, akte të panumërta të vrasjeve arbitrare, mjerim, degradim dhe vdekje për popullin e Irakut dhe e kemi quajtur këtë sjellje e lirise dhe demokracisë në Lindjen e Mesme," tha Pinter me rastin e pranimit të Çmimit Nobel për Letërsi.

Harold Pinter shpesh herë është përshkruajtur si "sedërmadh" dhe nuk fliste per shkurorëzimin e tij prej aktores Vivian Merchant, të birin me të cilin nuk fliste apo aferën e tij me Joan Bakewell para se të martohej me historianen Lady Antonia Fraser.

Por për miqtë e vet, ai ishte i afërt dhe i ngrohtë. Dhe të paktë janë ata që do të vinin në dyshim rëndësinë e veprave të tij, përfundon Kris Jones i BBC-së.