Kryeministri italian e vizitoi Shqipërinë për herë të dytë

Gjatë vizitës, Shqipëria dhe Italia nënshkruan disa marrëveshje, mes tyre dhe dy projekte të rëndësishme në fushën e energjetikës.

Kjo ishtë vizita e dyte e zotit Berluskoni në Shqipëri në cilësinë e kryeministrit të vendit fqinjë.

Vizita e tij e parë është realizuar në vitin 2002, kur në pushtet ishin forcat e majta dhe kryeministër ishte Fatos Nano.

Nga të dy palët vizita e zotit Berluskoni vlerësohet se konfirmon marrëdhëniet e shkëlqyera midis Tiranës dhe Romës.

Kohët e fundit, zyrtarë të lartë shqiptarë përfshirë dhe presidentin Topi dhe kryeministrin Berisha kanë vizituar Italinë, e po kështu autoritete të larta italiane kanë vizituar Shqipërinë.

Projekte të rëndësishme

Por vizita e kësaj radhe kishte një rëndësi të veçantë pasi gjatë saj janë nënshkruar disa projekte të rëndësishme në fushën e energjitikës midis dy vendeve, me një vlerë prej 2.5 miliardë euro.

Bëhet fjalë për një kontratë me vlerë 1 miliardë euro me grupin Falcone të Italisë për ndërtimin e një uzine rigazifikimi pranë Fierit dhe një tubacion gazi nën det për në Itali dhe një marrëveshje me vlerë 1.5 miliardë euro për firmën ndërtuese Mocanda, për projektin e prodhimit të energjisë me anë të erës, në gadishullin e Karaburunit, si dhe një kabëll energjie që do të shkojë nga Adriatiku në Itali.

Për autoritetet shqiptare këto projekte janë shumë të rëndësishme parë dhe në konteksin e krizës energjitike disa vjeçare që po përjeton Shqipëria.

Për BBC, këshilltarja e kryeministrit Berisha, Suzana Guxholli tha se “ këto projekte kanë disa vite që testohen, por pritet që gjatë vizitës të diskutohen edhe projekte të tjera".

Nga ana e saj edhe opozita shqiptare shpreh miratimin për këto projekte, por sipas ish-ministrit të Jashtem shqiptar, Kastriot Islami sërisht duhen marrë në konsideratë çështjet e mjedisit, apo ato të korrupsionit.

”Nuk bëhet fjalë për kundërshtime të karakterit politik” thotë për BBC zoti Islami, por sipas tij bëhet fjalë për çështje të korrupsionit të lartë, sikurse është rasti i ndërtimit të rrugës Durrës-Kukës-Morinë.

Doza dyshimi

Marrëveshjet në fushën e energjisë midis Shqiperisë dhe Italisë nga specialistët e energjitikës, shihen me entuziazëm për faktin e thjeshtë se po investohet dhe në këtë fushë që prej vitesh ndodhet në krizë.

Por specialsitët kanë shprehur dhe dyshim nëse projektet në fjalë mund të ndihmojnë në tejkalimin e krizës.

Një prej tyre Gjergji Simaku, për BBC thotë se “nuk mund ta besoj se Shqipëria do të prodhojë energji nga era sa impiantet më të mëdhenj në Europë, por le të fryjë pak erë energjie dhe diçka të bëhet”.

Lëvizja Mjaft paralajmëroi protesta pranë kryeministrisë prag të vizitës së z. Berlusconi.

Sikurse thuhet në një njoftim të shpërndarë për median “reagimi vjen nga rreziku i industrializimit ndotës, të pakonsultuar dhe jo transparent që qeveria shqiptare planifikon ta shtrijë në mbarë vendin, përmes ujdive me ndërmarrje kolonialiste me vendet fqinje”.