Arbër Vllahiu BBC Prishtinë

	Tadiq është pro ndryshimit të marrëveshjes

Reagimet e udhëheqësve politikë të Kosovës, pasuan një kërkesë të presidentit serb Boris Tadiq, të paraqitur në bisedimet e para disa ditëve të udhëheqësve ushtarakë serbë me përfaqësuesit e NATO-s në Napoli të Italisë, për rivlerësimin e Marrëveshjes Teknike të Kumanovës.

Presidenti serb Tadiq midis të tjerave tha se "nuk ka asnjë arsye që në këtë çast, kur Serbia tregon se është faktor i stabilitetit në rajon, të mos ndryshohet kjo Marrëveshje. Sepse, ka thënë ai, pjesët e asaj Marrëveshje janë të atilla saqë akoma ekziston zona e fluturimit të ndaluar."

Tadiq ka vënë në dukje se Serbia nuk është faktor i de-stabilitetit dhe oficerët e ushtarët e saj nuk kanë shtënë kundër askujt, duke nënvizuar se "tjerët kanë shtënë kundër qytetarëve të nacionalitetit serb, kundër oficerëve dhe ushtarëve serb."

Çfarë ka marrëveshja

Marrëveshja e Kumanovës, e nënshkruar më 9 qershor të vitit 1999, i dha fund fushatës ajrore të NATO-s mbi objektivat serbe dhe i hapi rrugën miratimit të Rezolutës 1244 të KS të OKB-së, me të cilën Kosova u vu nën administrimin ndërkombëtar.

Marrëveshja që u arrit mes NATO-s dhe forcave serbe të sigurimit, pas 78 ditë të bombardimeve mbi objektivat serbe, çoi në tërheqjen e plotë të trupave serbe nga Kosova.

Disa vjet me parë, komanda e NATO-s hoqi pjesërisht zonën mbrojtëse 5 kilometërshe mes Kosovës dhe Serbisë, duke e cilësuar mjedisin si të sigurt.

Mirëpo Marrëveshja e Kumanovës vazhdon të jetë në fuqi në disa fusha, përfshirë edhe zonën e ndalimit të fluturimeve.

Kërkesa e Serbisë vjen pas miratimit në Këshillin e Sigurimit të një raporti të sekretarit të përgjithshëm, Ban Ki Moon, që ka përfshirë edhe një marrëveshje gjashtëpikëshe të OKB-së me Serbinë, e cila i jep një autonomi të lartë serbëve të Kosovës, në veçanti veriut të saj.

Raporti i zotit Ban përfshin edhe reagimin katërpikësh të Prishtinës zyrtare, e cila ka kërkuar shtrirjen e misionit evropian për drejtësi dhe polici, EULEX, në tërë tërritorin e Kosovës, mbi bazën e Planit Ahtisaari dhe të Kushtetutës së saj.