Luftimet vazhduan për afro 3 ditë

Duke folur në tv indian, presidenti i Pakistanit Asif Ali Zardari, paralajmëroi kundër çdo reagimi të tepruar.

Ai tha se qeveria e tij do të veprojë me shpejtësi nëse ka fakte se individë apo grupe pakistaneze janë përfshirë në sulme.

Por ministri i jashtëm, Shah Mehmood Qureshi, tha se India nuk kishte ofruar fakte të tilla.

Politikanët indianë thonë se personi i vetëm që ka mbijetuar dhe që është nën arrest, është nga Pakistani.

Përfundon rrethimi i Bombeit

Forcat e sigurisë në Indi thonë se sulmi i koordinuar i militantëve në Bombei ka përfunduar pas më shumë se dy ditësh.

Një komandant ushtarak tha se tre militantë ishin vrarë në betejën e fundit me armë në hotelin Taj Mahal.

Luftimet panë intensifikim të mëtejshëm në hotel me ardhjen e agimit me flakë dhe tym që dilte nga dritaret.

Autoritetet në Bombei thonë se të paktën 195 vetë janë vrarë.

Kanë fillluar ndërkohë të kryhen varrimet e viktimave indiane të vrara. Qindra vetë morën pjesë në funeralin e shefit të luftës kundër terrorizmit, Hemant Karkare, që ishte midis viktimave të vrara gjatë sulmit.

Të gjithë tani do t'i drejtojnë sytë tek hetimi që do të bëjë India mbi sulmet, thotë korrespondenti i BBC-së atje.

Pyetjet kanë filluar mbi atë se si shërbimet sekrete indiane nuk arritën të zbulojnë asgjë për këto sulme.

Komandot indiane mendojnë se militantët e njihnin mirë hotelin pasi ata ishin shumë të lëvizshëm gjatë rrethimit duke vështirësuar kështu punën e autoriteteve të sigurisë për të evakuar personat që po rrinin në hotel.

Media indiane ka raportuar se një nga militantët kishte punuar në hotel si kuzhinier për 10 muaj.

Disa e kanë përshkruar ngjarjen si 11 shtatori i Indisë dhe njerëzit atje duan përgjigje tani se kush është përgjegjës.