Presidenti Sejdiu tha se gjeti 'mirëkuptim' për qëndrimin kosovar

Kjo ishte vizita e parë e zyrtarëve të autoriteteve të Prishtinës në Britaninë e Madhe me ftesë të kryeministrit.

Pas takimit, një zëdhënës për kryeministrin britanik i tha BBC-së se zoti Brown kishte theksuar angazhimin britanik pë stabilitetin në Kosovë, por u kishte kërkuar autoriteteve kosovare që të angazhoheshin për arritjen sa më shpejt të një marrëveshjeje për vendosjen e EULEX-it.

Presidenti i Kosovës Fatmir Sejdiu tha pas takimit se pala kosovare kishte shprehur qëndrimin e saj të prerë kundër planit gjashtë-pikësh të OKB-së.

Intervista me presidentin Sejdiu

Zoti Sejdiu tha për BBC-në se kundërshtimi i Prishtinës kishte hasur në 'mirëkuptim'. Albana Kasapi bisedoi me zotin Sejdiu që fillimisht tregon se për çfarë u bisedua.

Sejdiu: Unë mund të them se është një rast i jashtëzakonshëm dhe me këtë rast them dhe njëherë se kemi marrë konfirmimin mbështetës të mbretërisë së bashkuar, duke evoluar fuqishëm vizionin politik që ne e kemi si Kosovë dhe në të njëjtën kohë pata një mundësi të jashtëzakonshme të shpreh falenderimet më të thella për mbështetjen e madhe që Mbretëria e Bashkuar i ka dhënë Kosovës në një periudhë të gjatë kohore, për përkushtimin e tanishëm që ka që të nxisë dhe të mbështese e të lëvizë në shumë aspekte të zhvillimeve të Kosovës sa më shpejt dhe një mbështetje të fuqishme ndërkombëtare në kuptimin e njohjes së mëtejshme të Republikës së Kosovës nga vende të tjera.

Prandaj me këtë rast vërtet mund të them se ishte një moment i mirë ku ne shprehëm dhe aspekte të shumta, të cilat kanë të bëjnë me zhvillimin e përgjithshëm apo proçese që kanë të bëjnë me Europën Juglindore.

BBC: Ju patët një takim dhe me zotin Milibend, për çfarë diskutuat në takim?

Sejdiu: Thelbi i takimit ishte që gjetëm dhe njëherë mundësi më të gjatë kohore për të shprehur sigurimet tona, zotimet që kemi dhënë për ndërtimin e Kosovës si një shtet demokratik, duke u mbështetur ne Projektin Ahtisari apo propozimin e tij gjithë përfshirës, se do të zbatojmë atë që e kemi parashikuar me Kushtetutën dhe ligjet e Republikës së Kosovës, se do të përcjellim një politikë të veçantë, të fqinjësisë së mirë dhe gjithë fqinjve që kemi përreth.

Është një fat i mirë që gjithë vendet me përjashtim të Serbisë deri tani, kanë njohur Pavarësinë e Kosovës dhe nesër krah kësaj lëvizje bashkëpunimi që kemi me Republikën e Malit të Zi, Shqipërinë, me Maqedoninë, do të dëshironim ta kemi dhe me Serbinë. Bashkarisht me vendet e rajonit, të krijojmë një klim të thellë bashkëpunimi dhe të lëvizim në përmbushjen e kritereve për integrimet Euroatlantike.

Unë mendoj se ky vizion i Kosovës është i palëkundur dhe këtë e shpreha në mënyrën më të mirë të mundshme dhe mendoj se morrëm një mbështetje të fuqishme dhe nga z. Milibend qe ishte para pak ditësh në Prishtinë.

BBC: Aktualisht për Kosovën është një moment delikat. Prej disa ditësh jeni nën presion për të pranuar të ashtuquajturin planin “6 Pikesh”. A u diskutua në takim për të?

Sejdiu: U përmend natyrisht, si tematikë që ka qenë e rrahur, e shkoqitur këto ditë dhe mund të them se ne nuk konsiderojmë presion këtë gje.

Për ne është me shumë rëndësi që ne kemi dhënë argumentet tona, përse ai plan për Prishtinën është i papranueshëm, por paralelisht kemi dhënë dhe zotimin tonë, vullnetin, përkushtimin tonë që të kemi nje vendosje sa më të shpejtë të EULEX-it, se do të ketë bashkëpunimin tonë, se do të jetë në mandatin ndërkombëtar, çfarë është parashikuar me Projektin Ahtisari dhe se do të jetë po ashtu në implementim të plotë të atyre politikave që ne i kemi ndërtuar dhe i kemi vënë dhe në dokumentat tona bazike, përveç deklaratës së Pavarësisë, në kushtetutën e Republikës së Kosovës.

BBC: Po Britania e Madhe, sa është për këtë planin “6 pikësh”?

Sejdiu: Unë mund të them se nuk ka ndonjë insistim që të interpretohet ashtu siç thatë ju në fillim si pjesë e presionit. Ka një vizion që e kanë shtruar dhe në Prishtinë, por ne mendojmë se kemi dhënë arsyet tona të plota dhe nuk heqim dorë nga bashkëpunimi jonë i thellë me Britaninë e Madhe, dhe me gjithë vendet e BE-së në këtë kuadër dhe se do të jemi partner i rëndësishëm në ecjet e mëtejshme për të realizuar një projekt të një Kosove sovrane, demokratike, të integritetit të plotë të saj territorial, të pacënuar, por edhe të zhvillimeve të saj të brendshme që do të çojnë në përmbushjen e kritereve për të qenë partner i mirë sot në bashkëpunimet rajonale dhe nesër natyrisht për të qenë anëtare e BE-së dhe e NATO-s.

BBC: Plani juaj “4 pikësh” është mbështetur nga Britania e Madhe?

Sejdiu: Të gjitha çështjet që ne kemi shtruar kanë patur mirëkuptimin edhe në Prishtinë. Ne kemi patur një debat të gjatë me gjithë përfaqësuesit e të 5 vendeve anëtare dhe me përfaqësuesin e BE-së dhe kanë konsiderata për ato elemente që ne kemi thënë.

Asnjëherë nuk kemi thënë që nuk e duam EULEX-in, asnjëherë nuk kemi thënë se nuk do të kemi bashkëpunim me vendet e BE-së dhe misioni ndërkombëtar që është dhe në përfundim UMNIK, për të përfunduar misionin suksesshëm dhe asnjëherë nuk kemi thënë se kemi raporte të këqija me gjithë vendet përreth. Pra, në këtë kuadër dhe me vet Serbinë. Prandaj ajo politikë ka respektin e vet.

BBC: Sipas jush si e bën këtë plani “6 pikësh”?

Sejdiu: Ne e vlerësojmë me elemente substanciale të tilla të tij është i papranueshëm dhe në këtë kuadër ne e kemi lënë gjithmonë mundësinë e ecjes më tej në kuptimin e zhvillimit të politikave të qëndrueshme që krijon stabilitet në Kosovë, por edhe në rajon.

BBC: Pra, sipas jush plani “6 pikësh” cënohet sovraniteti i Kosovës?

Sejdiu: Ne kështu e konsiderojmë planin “6 pikësh” që bën një anashkalim të vullnetit të institucioneve të Kosovës dhe dialogun me to, dhe nga ana tjetër ne konsiderojmë se kanë një hapësirë të mirë dhe një bazë të rëndësishme të implementimit të vendosjes së EULEX-it, mbi bazë parimesh që janë vendosur dhe më herët.

BBC: Po si do shkohet më tutje?

Sejdiu: Ne do shohim që të vendoset sa më shpejt, do jemi partnerë shumë të mirë të bashkëpunimit, sigurisht që do të jetë dhe një kohë e limituar në mandatin që do të ketë sepse është një mekanizëm ndërkombëtare Europian në këtë rast, bashkë më SHBA dhe politikat implementuese lidhen pikërisht me Projektin Ahtisari.

BBC: Ambasadori Britanik në Serbi, ka deklaruar që Britania mbështet planin “6 pikësh”. A u tha diçka e tillë nga zoti Milibend apo z. Brown në këtë pikë?

Sejdiu: Unë them se ka një shpjegim që është dhënë dhe në Prishtinë, natyrisht që nuk është plan që konsiderohet si kundër sovranitetit të Kosovës, pavarësisht nga ky fakt ka një respekt në qasjet që ne kemi dhe për ne është me rëndësi që të zhvillohen hapa të rëndësishëm strategjik në implementimin e politikave të rëndësishme të misionit themelor që EULEX do të ketë në Kosovë.

Ne nuk hezitojmë asnjëherë që të gjendemi në çdo kohë në një partneritet të thellë për vendosjen sa më të shpejtë dhe për kryerjen e këtij misioni parësor që ka.

BBC: A po i kërkoni ju komunitetit ndërkombëtar që ta rishikojë planin “6 pikësh” duke marrë parasysh 4 pikat tuaja dhe ndoshta mund të ketë një zgjidhje kompromisi për këtë çështje?

Sejdiu: Do të ketë konsideratë dhe në qëndrimin që ne kemi shprehur dhe do të shohim si do të shkoj më tej. Për ne është me rëndësi që kërkesa jonë është e bazuar në një arsye dhe gjykim shumë të shëndoshë. Ne kemi parashtruar gjykimin tonë shumë qetë, shumë mirë dhe me zyrtarët britanikë.

BBC: Dhe BE, dhe ju e thatë që kërkoni që EULEX të vendoset sa më shpejt në Kosovë, sepse normalisht duhej të ishte vendosur po të ishin mbajtur të gjitha afatet. Duke patur parasysh këto zhvillimet e fundit, mendoni se do shtyhet më vendosja e EULEX-it, apo mund të zgjidhet në afatin që ka thënë BE, muaji dhjetor?

Sejdiu: Unë mendoj se nuk do shtyhet, çështjet janë aq të qarta sa duhet vetëm një veprim energjik që të kemi një vendosje të EULEX-it në gjithë territorin e Kosovës. Mund të them lirisht se EULEX-i e ka një motiv parësor që dhe ne e kemi mbështet të vendoset shumë shpejt në ato pjesë të Kosovës, ku ka një veprim të strukturave të cilat në një formë apo tjetër janë në kundërshtim me strukturat ilegale në Kosovë.

Në veri të Kosovës është shumë e domosdoshme që të kemi stabilitet, qetësi, vendosje të rendit ligjor dhe kjo do të kontribuojë dhe në relaksin e përgjithshëm të marrëdhënies.

BBC: Cilat janë ato pika praktike në planin “6 pikësh” që ju shqetësojnë dhe ju bëjnë ju të mendoni se shkelet sovraniteti Kosovës, dogana, policia?

Sejdiu: Ne kemi elaburuar dhe me herët dhe mendoj se mundësia mos të jetë hapësirë shumë e bollshme për të thënë këto. Prishtina është anashkaluar në këtë proçës. Nuk janë marrë parasysh vërejtjet tona që ne i kemi dhënë që në fillim dhe çështja tjetër është se në 3 fusha të rëndësishme dogana, policia dhe gjyqësori, që shprehin dhe shtetësinë e një vendi apo sovranitetin e vendit, të cilat në një mënyrë apo tjetër dalin nga kuadri se si i kemi parashikuar ne.

BBC: Zhvillimet e kohëve të fundit kanë qenë interesante, në kuptimin që Kosova shpalli pavarësinë, Beogradi ka nisur një fushatë aktive diplomatike që rezultoj njëra plani “6 pikësh” dhe Kombet e Bashkuara bën një kompromis me Beogradin. E dyta çështja e kalimit të legjitimitetit të Pavarësisë së Kosovës, në Gjykatën Ndërkombëtare të Drejtësisë. Si këto zhvillime dhe kjo fushatë aktive e Beogradit, i kanë bërë të mendojë autoriteteve të Prishtinës?

Sejdiu: Këto çështje duhen parë paralelisht dhe me sytë e Europës dhe me sytë e Prishtinës. Për ne është shumë e rëndësishme të theksojmë dhe riargumentojmë atë që e kemi thënë edhe më herët që Beogradi luan me politikë dyshe. Luan politikën që dëshiron, po e them si proklamim që të jetë pjesë dhe e BE-s dhe NATO-s dhe e politikës pro perëndimore duke marrë mbështetje nga vendet e perëndimit për të patur pozicione të brendshme në qeverisje dhe në anën tjetër luan kartën tjetër të shembjes së sovranitetit të Kosovës.

Këto dy çështje nuk mund të shkojnë bashkë. Për ne është me shumë rëndësi që edhe vrojtimi Europian të jetë i vëmendshëm ndaj të gjitha lëvizjeve që bëhen në Beograd karshi Kosovës dhe karshi proçeseve të brendshme që kanë brenda vetvetes.

Ne kemi vlerësuar që vendet perëndimore kanë mbështetur ardhjen në fuqi të një qeverie të cilësuar po perëndimore. Po e marr z. Thadiç për te fituar zgjedhjet presidenciale dhe që të fitojë dhe në zgjedhjet parlamentare dhe të ketë një qeveri në të cilën ai do të jetë personi kryesor. Por në të njëjtën kohë mendoj se duhet të jepen prova paralele pikërisht për këtë qasje të investuar nga ana e perëndimit që Beogradi të heqë dorë nga një rrugë e cila nuk është e drejtë. Unë them dhe e them me përgjegjësi se çdo qeveri e Beogradit nga koha e Millosheviç e deri më tani e dinë se ku janë kriminelët e luftës, që jetojnë në Serbi, që kanë bërë krime ne Kroaci, që kanë bërë krime në Bosnjë, që kanë bërë krime në Kosovë dhe që jetojnë lirshëm dhe asnjë nga këto qeveri nuk ka bërë asnjë përpjekje për ti dorëzuar këta njerëz.

Prandaj them që kjo është një lojë dyshe, një lojë që shpreh një identitet jo të qëndrueshëm në një kornizë apo në një vertikale e cila do ta shprehte identitetin e një shteti. Nga ana tjetër Kosova nuk është më temë që duhet ta shtrëngoj Beogradin.

BBC: Ju kërkoni nga BE dhe nga komuniteti ndërkombëtar që të tregohet ndoshta më i ashpër me Beogradin në këtë çështje?

Sejdiu: Unë them të vazhdoj më konstruktivitetin dhe me konsistencën në plotësimin e kritereve të çdo vendi që duhet të jetë i përputhshëm dhe të hyjë vala dhe zhvillimi i atyre që i quajmë kritere të përbashkëta të BE-së. Unë nuk mund ta kuptoj një vend që fsheh kriminelët e luftës të jetë në BE, unë nuk mund ta kuptoj një vend që cënon sovranitetin e një vendi tjetër të jetë në BE, unë nuk mund ta kuptoj një vend i cili konsideron gjithë botën tjetër armiq të vetvetes. Kjo është një filozofi e tmerrshme që zë fill jo vetëm me Millosheviçin, por edhe më herët.