Jonathan Marcus Korrespondent diplomatik i BBC-së

	Miliband thotë se Siria duhet të luajë rol për stabilitetin rajonal

Ai është zyrtari më i lartë britanik që viziton Damaskun që prej shtatë vjetësh.

Zoti Miliband do të takohet me presidentin sirian Bashar al Assad.

Pas mbërritjes në Siri, ai tha se situata në Lindjen e Mesme mbetej e brishtë dhe Siria duhet të luante një rol thelbësor për të inkurajuar hapat drejt stabilitetit.

Perspektiva

Presidenti francez Nicolas Sarkozy ishte i pari që hapi dyert e përmirësimit të kontakteve me Damaskun.

Me këtë vizitë, sekretari i jashtëm britanik, David Miliband, po hedh një hap më tej.

Gjithësesi, në një kuptim, këto janë hapa paraprake.

Biznesi i vërtetë duhet të kryhet mes Damaskut dhe Uashingtonit.

Vëmendja është përqëndruar te politikat që do të ndjekë presidenti i sapozgjedhur amerikan, Barak Obama.

Shfrytëzimi i mundësive për vendosjen e kontakteve diplomatike me vendet që janë konsideruar si armike të Shteteve të Bashkuara, përbën një qasje të re në politikën e jashtme të zotit Obama.

Nëse ai do të autorizojë vendosjen e kontakteve me Sirinë, kjo pritet të gjejë mbështetje të madhe nga aleatët evropianë.

Çështja shtrohet se çfarë do të ofrojë Siria në këmbim të këtij bashkëpunimi.

Për momentin presidenti sirian, Bashar al Assad, po tregohet i matur, duke mos i treguar ende letrat e tij pa e parë se kush do të jetë lojtari që do të ulet në tavolinë.