Marrëveshja pritet të aprovohet në parlament

Të gjithë trupat në Irak do të largohen brenda tre viteve dhe ushtarët do të tërhiqen nga qytetet kryesore nga vera e ardhshme në një marrëveshje të aprovuar nga kabineti irakian.

Sipas marrëveshjes, trupat britanike pritet të largohen nga Iraku nga fundi i vitit tjetër.

Pakti që gjithashtu kufizon operacionet amerikane në vend do t'i jepet së shpejti për aprovim parlamentit.

Hoshyar Zebari, ministri i jashtëm ka besim se marrëveshja do të aprovohet para 25 nëntorit.

Po në The Times, "Obama do të ndjekë metodën e Lincolnit në përzgjedhje të kabinetit të tij."

Barack Obama tha se ai do të caktojë të paktën një republikan në kabinetin e tij.

Obama që takohet sot me zotin John MacCain për të diskutuar rrugët se si të punojnë së bashku, tha se ai do të bëjë të ditur postet shumë shpejt, ditë pasi ai diskutoi me Hilary Clintonin mundësinë për ta bërë atë sekretare të shtetit.

Në intervistën e tij të parë që pas marrjes së postit, zoti Obama citohet nga gazeta të ketë thënë se para tij detyra është e madhe dhe e shumëanëshme.

The Indipendent ka artikullin me titull "50 mijë largohen nga shtëpitë, ndërsa zjarri përfshin Kaliforninë."

Qindra shtëpi digjen në Los Anxheles të përfshira nga flakët më shkatërruese që mbahen mend.

Sipas shifrave të nxjerra në këtë dekadë, shkruan gazeta, nga zjarret që kanë përfshirë Kaliforninë miliona ha tokë janë shkatërruar.

Zjarret e vitit 2007 kanë prodhuar më shumë gazra që kanë efektin serë sesa 440 mijë makina në vit.

The Guardian ka artikullin me titull " Rubineta të reja? Apo siguri në Irak? Evropiano lindorët i përgjigjen thirrjes."

Gazeta shkruan se fillimisht ishin hidraulikët polakë që i morën shumicën e punës rivalëve britanikë.

Tani duket një fushë tjetër ku evropiano lindorët po heqin britanikët nga një punë e paguar mirë - Linja e frontit në Irak dhe Afganistan.

Flitet këtu për rojet e sigurisë dhe bodigardët e firmave të ndryshme të biznesit.

Shumë kompani po përpiqen të ulin pagesat që u bëjnë këtyre rojeve duke marrë staf nga Evropa lindore, kryesisht serbë dhe kroatë.

"Rusia e Putnit duhet të kthjellohet," është komenti në The Daily Telegraph.

Një ekonomi në rënie jep provën më të fortë për udhëheqësin autokratik, por shtetasit nuk duhet ta dinë këtë gjë.

Media ruse i tregon popullsisë së vet se SHBA ka hyrë në rënie të pakthyeshme, britanikët po hidhen në Tamiz dhe mbretëreshës i është dashur të shesë diamante.

Duket se kriza po ndjehet pasi tashmë klase e mesme përbën 18% të popullisë nga 25%. "Festa duket se ka mbaruar," citon gazeta. "Nëse çmimet e naftës nuk rriten, Rusia mund të hyjë në recesion."

Financial Times natyrisht flet për samitin e G20 të mbajtur në fundjavë.

Sipas gazetës, udhëheqësit paraqitën një front të bashkuar në samit që diskutoi krizën ekonomike.

Po në këtë gazetë është dhe artikulli "Londra duket se do të humbë 370 mijë vende pune brenda dy viteve të ardhshme."