Fjalimi i zotit Medvedev ka ngjallur shqetësim në NATO

Zoti Medvedev tha se Moska ka në plan të dislokojë raketa me rreze të shkurtër veprimi në enklavën e Kaliningradit, në kufirin me Polonisë dhe Lituanisë, për t'iu kundërvënë planeve amerikane për vendosjen e një sistemi mbrojtës kundër raketave në Evropën Qendrore.

Si Polonia ashtu edhe Lituania janë anëtarë të NATO-s.

Zoti Medvedev e bëri këtë njoftim vetëm pak orë pas fitores së zotit Barack Obama në zgjedhjet presidenciale.

Departamenti i Shtetit tha se njoftimi i zotit Medvedev ishte zhgënjyes.

Një zëdhënës i NATO-s tha se ky hap i Moskës nuk do të ndihmonte në përmirësimin e marrëdhënieve.

Ministri i jashtëm gjerman, Frank Walter Steinmeier, tha se Rusia po i dërgonte botës një mesazh të gabuar.

"Komentet e presidentit Medvedev për vendosjen e raketave në Kaliningrad, sigurisht, janë një sinjal i gabuar në kohën e gabuar. Është e rëndësishme që Rusia ta shfrytëzojë shansin për të kërkuar një dialog me Shtetet e Bashkuara për të mos ndikuar në ringjalljen e një gare të re armatimi në Evropë", tha ministri i jashtëm gjerman, Frank Walter Steinmeier.