Fatos Ahmati Korrespondent i BBC-së në Tiranë

Ambasadori amerikan në Tiranë, John Withers ka dalë hapur në mbrojtje të prokurores së përgjithshme Ina Rama.

"Detyrat që zonja Rama ka marrë përsipër janë reale", tha zoti Withers.

Sipas tij përgjegjësitë e prokurores së përgjithshme janë që jo vetëm të hetojë disa prej çështjeve më të vështira dhe me të debatueshme ndonjëherë në Shqipëri, por detyra e saj është në një kuptim shumë më të madh dhe të thellë, të japi një kontribut thelbësor për ndërtimin e demokracisë shqiptare duke mbrojtur pavarësinë e prokurorisë dhe gjyqësorit në tërësi nga ndërhyrjet apo sulmet politike.

Duke lënë mënjanë gjuhën diplomatike, ambasadori amerikan Withers e quajti të çuditshme, konfuze dhe shqetësuese iniciativën për të kërkuar një komision hetimor ndërkombëtar të bërë të njohur pak ditë më parë nga kryeministri Berisha.

Prokurorja e përgjithshme Ina Rama pas këtyre deklaratave për mbështetje, të përsëritura më fortë gjatë ditëve të fundit duket se e ka ndjerë veten mirë. "Falendëroj ambasaden dhe qeverinë amerikane për mbështetjen" tha ajo në emër të trupës së prokurorëve.

Ndërhyrja e zotit Withers është ndoshta më e ashpra ndaj një qeverie shqiptare në dy dekadat e fundit.

Opozita shqiptare e ka mbështetur këtë qëndrim. Kryetarja e grupit parlamentar socialist, Valentina Leskaj tha se "nuk do të pranojmë asnjë komision parlamentar që është antikushtetues dhe që cënon institucionet e pavarura"".

Por deputeti demokrat Aldo Bumçi tha se nuk bëhet fjalë për një komision për të goditur organin e akuzës në bllok. "Ne kemi një shqetësim se ka patur ndërhyrje politike dhe shkelje të të drejtave të njeriut në rastin e zotit Fazllic", tha zoti Bumçi.

Ndërkaq lidhur me propozimin për hetim ndërkombëtar në Shqipëri të bërë nga kryeministyri Berisha, zoti Bumçi tha se kjo është cështje tjeter.

"Ajo ka të bëjë me seriozitetin e qeverisë nëse i ka dhënë ose jo para nga fondet publike zotit Fazllic" tha deputeti demokrat.

Por çështja Fazllic më së shumti duket se ka qënë e pranishme në parlamentin shqiptar.

Opozita ka ngritur akuzat se në tokat e blera nga biznesmeni serbo-boshnjak qeveria po përgatitet të japi leje për ndërtimin e një TEC-i.

Kryeministri Berisha i hodhi poshtë ato dhe i kërkoi opozitës të përgatisi një ligj për shtetëzimin e këtyre tokave.

"Bëjeni dhe unë do ta miratoj" - tha Berisha duke e akuzuar opozitën se ka frikë nga implikimet e saj me mafian.

Por nga ana e saj opozita tha se nuk bëhet fjalë për një ligj të tillë. Erion Braçe i PS-së duke folur për BBC tha se do të ishte mirë që qeveria të aplikonte ligjin e shpronësimit për interesat publike.

Ndërkaq në të njëtën ditë në Vjenë prezenca e OSBE -se në Shqipëri, paraqiti raportin para këshillit të përhershëm të organizatës.

Ndër shqetësimet e organizatës është se disa projektligje të qeverisë kanë synuar të vënë nën kontroll pushtetin gjyqësor.