Ilir Kadia BBC Tiranë

	Kuvendi diskuton projekt-ligjin për administratën gjyqësore

Pritet që për projekt-ligjin të zhvillohen debate të forta mes shumicës dhe opozitës rreth pavarësisë së gjyqësorit në vend.

Kundërshtarët e projekt-ligjit mendojnë se qeveria po përpiqet të marrë rol më të madh në gjyqësor.

Ministri i Drejtësisë Enkelejd Alibeaj tha për BBC-në se projektligji për administratën gjyqësore do të rregullojë statusin e administratës gjyqësore duke forcuar si rrjedhim pavarësinë e krejt gjyqësorit.

"Ligji për administratën gjyqësore plotëson një vakuum të 18 vjetëve," tha zoti Alibeaj.

"Ky ligj garanton profesionin e administratës gjyqësore duke e barazuar me statusin e nëpunësit civil," tha ai.

Kundërshtime

Kundërshtarët e projekt-ligjit shprehin shqetësim se ai do të cënojë pavarësinë e gjyqësorit duke rritur rolin e ekzekutivit.

Kryetarja e shoqatës së gjyqtarëve Manjola Bejleri këmbëngul se me shkëputjen e administratës nga gjyqësori drejt ekzekutivit cënohet fort pavarësia e tij.

"Ligji është antikushtetues ndaj ne e kemi paditur në Gjykatën Kushtetuese," tha zonja Bejleri në një intervistë për BBC-në.

"Duke vënë administratën e gjyqësorit në varësi të ekzekutivit cënohet rëndë pavarësia jonë," tha ajo.

Deputetët e shumicës pritet të përkrahin e votojnë projek-ligjin e qeverisë, ndërsa deputetët e opozitës janë rreshtuar paraprakisht me shoqatën e gjyqtarëve që kundërshton projekligjin.