Debati ishte më shumë argumentativ

Z. Obama tha se paketa në vlerë 700 miliardë dollarë në ndihmë të ekonomisë së vendit ishte 'vendimi final' për vitet e qeverisjes republikane.

Ai tha se z. Mccain kishte 'gabuar' në Irak dhe u përpoq ta lidhte atë me Presidentin Bush.

Senatori republikan tha se rivali i tij nuk kishte përvojën e duhur për të udhëhequr vendin.

Debati i parë televiziv mes rivaleve ishte më shumë argumentativ sesa luftarak.

Asnjëri prej tyre nuk e goditi tjetrin sa të konsiderohet si fitues, por sondazhet pas debatit sugjerojnë se Obama ishte në avantazh.

Sipas një sondazh përmes telefonatave të kryer nga CNN dhe Korpusi i Hulumtimit të Opinioneve, 51 përqind e të telefonuarve thanë se z. Obama kihste fituar, kundrejt 38 përqind që thanë se fitorja i përkiste z. McCain.

Ndërkohë, sipas një sondazhi të votuesve të pavendosur të kryer nga CBS News, 39 përiqnd ia dhanë fitoren z. Obama, 25 përqind z. Mccain dhe 36 përqind thanë se rezultati ihste i barabartë.

Ekipet elektorale të të dy kandidatëve shpallën fitore. Ekipi i z. McCain tha se kandidati i tyre kishte demonstruar epërsi në çështjet e sigurisë kombëtare, ndërsa ekipi i z. Obama tha se ai e kishte kaluar me rezultat shumë të mirë provimin e komandantit të forcave të armatosura të vendit.

Argumenta

Debati që pritej të ndiqej përmes televizionit nga dhjetëra milionë amerikanë, u mbajt vetëm rreth pesë javë para zgjedhjeve të 4 nëntorit.

Senatori McCain tha se ai nuk kishte nevojë të trajnohej për postin (e presidentit).

"Jam gati ta marr (postin) që tani," tha ai.

Por senatori Obama tha se z. McCain e kishte gabuar për pushtimin e Irakut dhe se lufta e kishte bërë Amerikën që ta largonte vëmendjen nga Afganistani, ku duhej të kishte vazhduar betejën ndaj Al-Kaidës.

Z. McCain argumentoi se si rezultat i përshkallëzimit të numrit të trupave amerikane në Irak, dërgimit të 30,000 trupa shtesë, strategjia ushtarake amerikane po korrte sukses.

"Ne po fitojmë në Irak dhe do të kthehemi në atdhe me fitore dhe me nder," tha ai.

Debati televiziv që u mbajt në Oxford, Mississippi, u përqendrua kryesisht në çështjet e politikës së jashtme, por nisi me një diskutim rreth krizës ekonomike që ka përfshirë SHBA.

Të dy kandidatët ranë dakord se plani i hartuar nga adminuistrata aktuale për t'i dalë në ndihmë ekonomisë do ta vinte buxhetin e presidentit të ri nën një presion të jashtëzakonshëm dhe do të thoshte se duheshin bërë shkurtime në shpenzimet e administratës.

'Kërcënim serioz'

I pyetur rreth Iranit, z. McCain theksoi se Teherani përbënte kërcënim për rajonin dhe për trupat amerikane të dislokuara në Irak, përmes ndërhyrjes atje.

Ai kritikoi z. Obama për gadishmërinë e shprehur më herët për të zhvilluar bisedime me udhëheqësit iranianë pa parakushte.

Z. Obama e hodhi poshtë këtë kritikë dhe tha se si persident, do të rezervonte të drejtën "për t'u takuar me këdo, në vendin dhe kohën që do ta zgjedh vetë, nëse një gjë e tillë do ta mbante Amerikën të sigurt".

Megjithatë, ai ra dakord me rivalin e tij republikan se "nuk mund ta tolerojmë një Iran bërthamor" dhe kërcënimin që do të përbënte ai për Izraelin, aleatin e fuqishëm të Amerikës.

'Më të sigurt'

Z. McCain e akuzoi z. Obama 'për pak naivitet' në reagimin e tij të parë ndaj konfliktit me Gjeorgjisë dhe Rusinë.

Ai tha se qeveria ruse, e ndihmuar nga petrodollarët, ishte bërë një "qeveri e drejtuar nga aparatçikët e KGB-së".

"E pashë në sy (kryeministrin rus, Vladimir) Putin dhe pashë tre shkronja- një K, një G dhe një B," tha z. Mccain.

Duke folur për të ashtuquajturën luftë kundër terrorizmit, z. McCain tha se besonte se Amerika tani ishte më e sigurt nga ç'kishte qënë ditën pas sulmeve terroriste të 11 shtatorit, por shtoi se ende kishte shumë për të bërë.

Z. Obama nënvizoi përhapjen e Al-Kaidës në rreth 60 vedne të botës dhe tha se SHBA duhet të bënte më shumë për ta luftuar dhe të përmirësonte imazhin e saj si "pishtar" për mbrojtjen e të drejtave të njeriut.

"Një nga gjërat që unë dua të bëj si president është që të përmirësoj pozitën e Amerikës në botë," tha ai.

Z. McCain u përpoq që të distancohej nga administrata e presidentit Bush, mbështetja për të cilën ka rënë ndjeshëm.

"Unë kam histori të gjatë dhe amerikanët më njohin mirë...disidenti i Senatit," tha ai.

Z. McCain kihste deklaruar se nuk do të merrte pejsë në debatin televiziv deri në momentin kur Kongresi të kishte miratuar planin në ndihmë të ekonomisë, por ai ndërroi mendje kur u arrit një farë përparimi drejt arritjes së një marrëveshje rreth planit.