Condoleezza Rice vlerësohet si një prej grave më të fuqishme në botë

Intervista u mor në kohën që zonja Rice merrte pjesë në punimet në OKB të Grupit të Grave Udhëheqëse.

Kriza financiare u duk se la në hije punimet e Asamblesë së Përgjithshme të Kombeve të Bashkuara, për të ndihmuar grupin e njerëzve më pak të avantazhuar në botë, që po t'i referohej një analizë përbën edhe gjysmën e racës njerëzore.

Një nismë është që të ndalohen vdekjet e grave dhe fëmijëve gjatë lindjes.

Një tjetër iniciatëve që prezantohej nga Sekretarja amerikane e Shtetit Condoleezza Rice ka si qëllim fuqizimin e grave.

Ajo vetë është cilësuar si edhe gruaja më e fuqishme e botës.

E përgatitur si pianiste e muzikës klasike, Condoleezza Rice ka treguar vendosmërinë e hekurt për të mbijetuar në një administratë të dominuar nga burrat.

Një biografi e re e zv/presidentit amerikan Dick Cheney, pretendon se në vitin 2004 kur Condoleezza Rice ishte Këshilltare për Sigurinë Kombëtare ajo u bë për të qarë kur ish Sekretari i Mbrojtjes, Donald Rumsfeld nuk pranoi të merrte pjesë në një takim të organizuar prej saj.

Autori i biografisë shkruan se Donlad Rumsfeld nuk e shikonte Dr Rice si të parabartë dhe mezi e fshihte këtë ndjenjë.

Në vitin 2005 kur situata në Irak u përkeqësua Condoleezza Rice u bë Sekretare e Shtetit, në kohën që Amerika kërkonte shokë.

Tani po thuhet se zonjës Rice iu dëgjua zëri në rrethanat e një disfate ushtarake.

Condoleezza Rice ishte në takimin e Asamblesë së Përgjithshme për të rritur influencën e grave në botë, ajo është një grua me influencë të konsiderueshme.

Por a mendon ajo se bota do të ishte një vend më i mirë sikur të udhëhiqej nga gratë?

Rice - Unë mendoj se bota mund të jetë një vend më i mirë nëse gratë janë plotësisht pjesë e jetës ekonomike dhe politike të shoqërive të tyre.

Patëm një disktutim frymëzues me shumë gra që janë udhëheqëse të huaja, përfshirë edhe katër presidente.

Është e qartë që është ndryshe kur gratë janë në gjendje të jenë plotësisht pjesë.

Asnjë shoqëri nuk mund të funksionojë mirë nëse gjysma e popullsisë së saj është e lënë mënjanë.

BBC - Shpesh herë thuhet se në nivel politik gratë kanë më pak gjasa të nisin luftë dhe më shumë gjasa të kërkojnë pajtim.

Ndërkaq ju jeni përgjegjëse për ekzekutimin e luftës kundër terrorizmit, për politikën e marrjes në pyetje të të dyshuarve nga një vend tek tjetri, dhe për paraburgime të tipit Guantanamo?

Rice: Unë nuk mendoj se gratë janë të predispozuara ndaj një lloj politike të veçantë. Nga ana tjetër, ato duhet të jenë të përfaqësuara në mënyrë të barabartë.

	Dr Rice është krenare me politikat e ndjekura nga administrata

Unë ndoshta e kam ndihmuar vendin tonë të vetëmbrohet dhe ta ndihmojë atë të mbrojë të tjerët, sepse mbi terrorin është një luftë globale.

Kur njerëzit e dhunshëm përpiqen të vrasin njerëz të pafajshëm ne duhet të përpiqemi t'i ndalim ata.

Dhe nëse ndonjë prej ekstremistëve do të vinte në pushtet ne e dimë se çfarë do të ndodhë me gratë.

BBC: A ju vjen turp ndaj ndonjë prej politikave të ndjekura?

Rice: Jam absolutisht krenare me atë që kemi bërë në përpjekjen për të mbrojtur veten dhe të tjerët.

Shtetet e Bashkuara vuajtën një sulm të tmerrshëm në 11 shtator dhe disa vende në botë kanë vuajtur sulme të tmerrshme.

Ndryshimi në luftën kundër terrorit është se kjo luftë nuk është një përforcim i ligjit. Nuk mund të lejojmë që njerëzit të kryejnë sulmet e tyre dhe pastaj të ndëshkohen, sepse nëse e bëjmë këtë mijëra vetë do të vdesin.

Unë jam shumë krenare që SHBA-ja ka mobilizuar në mënyrë ndërkombëtare një koalicion për tu përpjekur që të ndalojë këta njerëz të rrezikshëm të sulmojnë të pafajshmit.

BBC: Pjesa më e madhe e këtyre politikave u hartuan nga burrat. A ka qënë e vështirë për ju që të bëni përparim në Shtëpinë e Bardhë të dominuar nga meshkujt?

Rice: Mendoj se këto poltika u hartuan nga një qeveri amerikane ku bëja pjesë dhe që po kundërpërgjigjej ndaj një sulmi të tmerrshëm.

Gjërat kanë ndryshuar prej asaj kohe, tani kemi mënyra më të mira për të mbrojtur veten, ndaj edhe kemi bërë ndryshime të politikave gjatë kësaj kohe.

Duhet të jemi të qartë: nëse njerëz të pafajshëm vdesin për arsye se qeveritë nuk veprojnë, nëse njerëz të pafajshëm vdesin për arsye se këta njerëz nuk ndalen përpara se të kryejnë sulme, atëherë qeveritë nuk po bëjnë punën e tyre.

Unë jam e sigurt për këtë: administrata amerikane, administrata e presidentit Bush ka bërë ç'ka mundur brenda përgjegjësisë ligjore si brenda vendit ashtu edhe jashtë për të siguruar që këto sulme nuk kryhen më kundër njerëzve të pafajshëm.

BBC: Në librin, Angler të Barton Gellman, një biografi e zv/presidencës së Dick Cheney, thuhet se Donald Rumsfeld nuk iu pëlqente? A e keni ndjerë këtë?

Rice: Unë e njoh Donald Rumsfeld, unë edhe ai njihemi prej vitesh. Natyrisht si Këshilltare për Çështjet e Sigurisë duke punuar me Sekretarë të Mbrojtjes është tjetër gjë, është një detyrë që kërkon që
t'i afrosh njerëzit dhe ndonjëherë nuk është e lehtë.

Donald Rumsfeld dhe unë kemi një marrëdhënie shumë të mirë që e ka fillimin prej shumë vitesh.

BBC: Kur historia ta gjykojë këtë administratë do ta gjykojë ashpër?

Rice: Unë mendoj se kjo administratë do të gjykohet mirë nga historia, së pari gjykimi i historisë dhe titujt e lajmeve të sotme nuk janë njësoj.

Kjo administratë, - nëse do të kemi fat që Shetet e Bashkuara të mos pësojnë ndonjë sulm tjetër si ai i 11 shtatorit - mendoj se do të gjykohet mirë.

Çdo ditë njerëz të këqij, kryesisht burra, planifikojnë dhe komplotojnë t'u bëjnë keq amerikanëve të pafajshëm, britanikëve të pafajshëm, pakistanezëve, afganë, irakianëve në mbarë botën.

Po ka qënë e vështirë, ne kemi qënë të ashpër, por ka nevojë për një lidership që vepron shpejt nëse kërkon të mbrosh popullsisë e pafajshme.

Unë jam shumë e kënaqur që kemi arritur të bëjmë sa kemi bërë. Më duhet ta them e para se Amerika dhe pjesa tjetër e botës janë më të sigurta se parë por jo të sigurta.

BBC: Shtëpia e Bardhë tha se sistemi financiar botëror përballet me mënxyrë të mundshme. A është kjo konseguencë e pangopsisë dhe sjelljeve të papërgjegjshme të një numri njerëzish në Wall Street.
Nuk ju bën kjo që të mendoheni përpara se t'i thonë botës që të praktikojë Kapitalizmin e Tregjeve?

Rice: Unë nuk di ndonjë alternativë tjetër të kapitalizmit demokratik. Le të kujtojmë atë që ndodhi me Bashkimin Sovjetik dhe përpjekjen për të kontrolluar gjithçka nga lart.

Ne kemi përpara një krizë ekonomike dhe presidenti foli për adresimin e kësaj çështje, deri tek shkaqet themeltare që e sollën atë.

Duhet të kujtojmë se ky është edhe një sistem ekonomik që është përgjegjës për shumicën e përparimeve në botë, qofshin në mjeksi apo teknologjinë informative, apo përparimeve që u ndihmuan burrave dhe grave që vinin nga rrethana ekonomike modeste që të përmirësonin jetën e tyre.

Ky është një sistem që është përgjegjës për këtë.

Dhe kur e pyesni veten se cila është alternativa, unë nuk mendoj se ka një të tillë.