Amerika i ka ofruar ndihma humanitare Gjeorgjisë

Z. Cheney shtoi se veprimet e Rusisë gjatë konfliktit të fundit me Gjeorgjinë e kishin vënë në dyshim aftësinë e Rusisë për të qenë partnere e besueshme në marrëdhëniet ndërkombëtare.

Ai po ashtu tha se Amerika ishte plotësisht e angazhuar ndaj përpjekjeve të Gjeorgjisë për t'u anëtarësuar në NATO.

Z. Cheney i bëri këto deklarata në Tbilisi, një ditë pasi SHBA njoftoi dhënien e një pakete ndihme në vlerë 1 miliardë dollarë për të rindërtuar Gjeorgjinë.

Konflikti mes Gjeorgjisë dhe Rusisë shpërtheu në 7 gusht pasi Gjeorgjia u përpoq të rimerrte me forcë rajonin separatist të Osetisë Jugore.

Forcat ruse nisën një kundërsulm dhe konflikti përfundoi me largimin e trupave gjeorgjiane nga Osetia Jugore dhe rajoni tjetër separatist, Abkhazia.

Rusia më pas njohu pavarësinë e të dy rajoneve dhe më herët gjatë kësaj jave tha se nuk e njihte presidentin e Gjeorgjisë Mikhail Saakashvili, të cilin e cilësoi si 'kufomë politike'.

Ndihma amerikane

Z. Cheney e bëri këtë deklaratë gjatë një konference të përbashkët për shtyp në Tbilisi me presidentin Saakashvili.

"Pasi kombi juaj fitoi lirinë në Revolucionin e Trëndafiltë', Amerika i erdhi në ndihmë kësaj demokracie të re kurajoze," tha z. Cheney.

"Ne po bëjmë sërish të njëtën gjë ndërsa ju punoni për të tejkaluar një pushtim të territorit tuaj sovran nga një përpjekje unilaterale jolegjitime për të ndryshuar me forcë kufijtë e vendit tuaj, e cila është dënuar në mënyrë universale nga bota e lirë".

"Veprimet e Rusisë kanë ngjallur dyshime të mëdha mbi synimet e Rusisë dhe aftësinë e saj për të qenë një partnere e besueshme (në skenën) ndërkombëtare, jo vetëm në Gjeorgji dhe në këtë rajon, por në gjithë sistemin ndërkombëtar," shtoi ai.

Gjeorgjia është një nga vendet kontribuese me trupa në operacionet e ushtrisë amerikane në Irak dhe është një nga pikat kyçe në rrjetin e eksportit të naftës dhe gazit nga Azia Qendrore drejt perëndimit, e cila nuk kalon në territorin e Rusisë.

Presidenti rus, Dmitri Medvedev e ka akuzuar Amerikën se po e ndihmon Tbilisin për të ndërtuar makinën e tij të luftës dhe ka kritikuar vendimin e saj për të dërguar ndihma humanitare për Gjeorgjinë në bordin e anijeve luftarake.

Më herët gjatë javës, udhëheqësit e Bashkimit Evropian ranë dakord të pezullojnë bisedimet për një marrëveshje të re partneriteti me Moskën nëse deri në momentin kur ajo të tërheqë trupat nga Gjeorgjia.

Z. Cheney që vizitoi të mërkurën Azerbajxhanin, do ta përfundojë turneun e tij në rajon të enjten në Ukrainë.