BBCAlbanian.com
 
Botuar: E premte, 29 gusht 2008 - 07:54 CET
 
Dërgoja një miku   Version i printueshëm
Obama nis fushatën historike
 
Barack Obama
Kandidimi i Obamës është historik
Barack Obama ka pranuar kandidimin e tij historik nga Partia Demokratike për zgjedhjet presidenciale të 4 nëntorit.

Ai e pranoi kandidaturën para një turme me rreth 75 mijë vetë në një stadium të Denverit.

Në fjalimin e tij para delegatëve të konventës demokrate, z. Obama tha se do të bënte të pamundurën që ta mbante gjallë ëndrrën amerikane për t'u ofruar shanse të gjithë amerikanëve.

"Amerikë, jemi më mirë se gjatë këtyre tetë vjetëve të fundit," tha ai."Ne jemi një vend më i mirë se kaq."

Z. Obama është afrikano-amerikani i parë që kandidohet për postin nga forcat kryesore politike në SHBA.

Premtime

Në fjalim, z. Obama premtoi se do të ndryshonte trendin e rënies ekonomike që po prek Amerikën dhe do të përmirësonte pozitën e vendit në botë.

Ai po ashtu sulmoi administratën aktuale të Bushit dhe rivalin e tij republikan për presidencën, John McCain.

"Ne jemi këtu sepse e duam këtë vend më shumë se sa të lejojmë që katër vitet e ardhshme të duken si tetë vjetët e fundit," tha ai.

"Ky moment, këto zgjedhje, janë shansi ynë që të mbajmë të gjallë në shekullin XXI, ëndrrën amerikane".

Z. Obama kritikoi z. McCain se nuke njihte realitetin e jetës së amerikanëve të thjeshtë dhe shtoi se ai nuk i kishte ndihmuar në çështje si ekonomia, kujdesi shëndetësor dhe arsimimi.

Ai po ashtu theksoi se do të kërkonte tërheqjen e trupave amerikane nga
Iraku.

Pritje e ngrohtë

Fjalimi i z. Obama rikujtoi mesazhin e martin Luther King-ut, i cili në të njëjtën ditë, 45 vjet më parë, mbajti fjalimin e tij 'kam një ëndërr' gjatë marshit historik në Uashington.

"Amerikë, nuk mund të kthehemi pas," tha senatori. "Nuk mund të ecim vetëm. Në këtë moment, në këto zgjedhje, ne duhet që edhe një herët të angazhohemi që të ecim drejt së ardhmes".

Z. Obama, të cilit iu bashkua në podium dhe kandidati i tij për zëvendëspresident, Joe Biden, u duartrokit nga audienca që u ngrit në këmbë.

Por fjalimi i z. Obama është kritikuar nga rivali i tij, John McCain.

Zëdhënësi i fushatës së z. McCain tha se fjalimi i z. Obama ishte 'çorientues'.

"Mbetet fakt, Barack Obama nuk është ende gati të jetë president," tha Tucker Bounds.

Fjalim 'serioz'

Korerspondenti i BBC-së në Denver, Justin Webb tha se ky fjalim i z. Obama duhej të ishte serioz, dhe provoi të ishte i tillë.

Fjalimi i z. Obama shënoi pikën kulmore të konventës katërditore të demokratëve, punimet e së cilës ishin planifikuar me shumë kujdes.

Në 4 nëntor z. Obama do të jetë përballë z. McCain , i cili pritet të kandidohet zyrtarisht nga republikanët gjatë konventës së tyre në st. Paul, në Minesotë javën e ardhshme.

Të premten z. McCain pritet të mbajë një miting në shtetin Ohajo, ku pritet të njoftojë të zgjedhurin e tij për postin e presidentit.

 
 
GJITHASHTU
 
 
Dërgoja një miku   Version i printueshëm
 
 
 
BBC ©
 
^^ Kthehu në krye
 
  Arkiv
 
  BBC News >> | BBC Sport >> | BBC Weather >> | BBC World Service >> | BBC Languages >>