Medvedev ka thënë se deri të premten do të ndodhë tërheqja

Projejkt-rezoluta riafirmon integritetin territorial të Gjeorgjisë dhe i bën thirrje Rusisë që të tërheqë trupat në pozicionet që mbante përpara konfliktit.

Por Rusia thotë se armëpushimi që pranoi javën e kaluar, u lejon trupave që të tërhiqen në një zonë sigurie në anën gjeorgjiane të kufirit me Osetinë Jugore.

Duke folur gjatë një takimi në OKB, ambasadori rus, Vitaly Churkin, u pyet nëse Rusia do të vendoste veton mbi rezolutën.

"Do të shohim. Sinqerisht ata mund ta hedhin në votë nëse duan, - do të shohim se çfarë do të ndodhë. Është humbje kohe, humbje kohe".

"Procesi i tërheqjes së forcave ruse do të vazhdojë, normalizimi i situatës do të vazhdojë, ushtria jonë do të marrë pozicionet si paqeruajtës në këtë zonë të sigurt," tha zoti Churkin.

Më herët Moska hodhi poshtë një paralajmërim të NATO-s se marrëdhëniet normale ishin të pamundura për sa kohë që trupat e saj mbeteshin brenda Gjeorgjisë.

Sekretarja amerikane e Shtetit, Condoleezza Rice ka thënë se Rusia nuk do të lejohet që të parandalojë që disa vende evropiane t'i bashkohen Aleancës.

Rusia thotë se presidenti Dmitri Medvedev i ka thënë presidentit Sarkozy se deri të premen, trupat ruse ose do të kthehen në shtëpi, ose do të tërhiqen prapa në Osetinë Jugore, ose në një zonë neutrale përgjatë kufirit.

Ditën e martë, trupat ruse u panë të largoheshin nga qyteti Gori, por korrespondentët thonë se kanë ende disa pozicione të artilerisë.

Operatorët në qytetin Poti të Detit të Zi i thanë BBC-së se forcat ruse kanë marrë kontrollin e portit komercial.

Më herët të dyja palët shkëmbyen të burgosur në post-blloqet pranë kryeqytetit, Tbilisi.

Korrespondentët e cilësuan këtë si një shenjë të rrallë bashkëpunimi në terren.