Adam Easton BBC, Varshavë

	Kremlini tha se sistemi raketor drejtohet kundër Federatës Ruse

Sekretarja amerikane e Shtetit, Condoleezza Rice ndodhej në Varshavë për ceremoninë.

SHBA-ja thotë se sistemi i mbrojtjes raketore do t'i mbrojë të dyja vendet dhe një pjesë të madhe të Evropës kundër sulmeve me raketa me rreze të gjatë veprimi nga elementë armiqësorë në Lindjen e Mesme.

Një radar në Republikën Çeke do të ngrihet për të diktuar raketat.

Marrëveshja i ka zemëruar rusët që kanë paralajmëruar se Polonia mund të bëhet objektiv për sulme bërthamore.

Pas gati 18 muaj negociatash, Condoleezza Rice dhe ministri i jashtëm polak, Radek Sikorski nënshkruan marrëveshjen për vendosjen e raketave amerikane dhe turpave amerikane në tokë polake.

Uashingtoni beson se 10 diktues raketash të vendosur në një bazë të papërdoru ushtarake pranë bregdetit të Detit të Zi, do ta mbrojë një pjesë të madhe të NATO-s nga sulmet e mundshme me rreze të gjatë veprimi.

Varshava shikon një kërcënim më të madh ndaj vendit të saj.

Për këtë arsye ajo ka kërkuar raketa Patriot me rreze të shkurtër për mbrojtjen e saj ajrore dhe një garanci se SHBA do t'i vijë në ndihmë në rast të ndonjë sulmi.

Si SHBA-ja ashtu edhe Polonia thonë se sistemi nuk është kundër rusëve.

Por as koha kur nënshkruhet kjo marrëveshje, gjatë konfliktit gjeorgjian, dhe as kërkesat e Polonisë nuk kanë bërë ndonjë gjë për të qetësuar Moskën.

Presidenti Dmitri Medvedev, tha se marrëveshja e Polonisë me SHBA-në ishte drejtuar kundër Federatës Ruse.

Presidenti polak, Lech Kaczynski, tha se vendosja e mbrotjes raketore vërtetonte se Polonia kishte për të luajtur një rol të rëndësishëm.

"Instalimi i sistemit mbrojtës do të thotë jo vetëm forcim të pozitës sonë në botë, - që vërteton se Polonia ka një rol të rëndësishëm gjeopolitik - , por është edhe një provë e qartë e forcimit të aleancës me vendin më të fuqishëm të botës, Shtetet e Bashkuara të Ameirkës," tha presidenti polak.